Rusiya hərbi hava bazalarına irimiqyaslı PUA hücumundan sonra Ukraynaya sərt cavab zərbəsi endirməyə hazırlaşır.
Teleqraf xəbər verir ki, bu barədə “The New York Times” ABŞ rəsmilərinə istinadla məlumat yayıb.
“ABŞ kəşfiyyatı Rusiyanın konkret hansı istiqamətlərdə zərbələr endirəcəyini hələ müəyyənləşdirməyib, amma rəsmilər hesab edirlər ki, Moskva mülki hədəflərə pilotsuz təyyarələrlə zərbələri bərpa edə, enerji sisteminə zərbələr endirə və ya ortamənzilli ballistik raketlərin yeni dalğalarını buraxa bilər”, - nəşr qeyd edir.
Xatırladaq ki, Ukrayna Milli Təhlükəsizlik Xidmətinin iyunun 1-də keçirdiyi “Hörümçək toru” adlı əməliyyat nəticəsində 41 Rusiya təyyarəsi, o cümlədən A-50, Tu-95, Tu-22 M3 və Tu-160 vurulub. Bu əməliyyat ilyarımdan çox müddətə hazırlanıb. Ukrayna PUA-ları eyni anda Rusiyanın 4 hərbi aerodromunda - Belaya, Dyaqilevo, Olenya və İvanovodakı hədəflərə hücum edib.
