Azərbaycanda Əmək Məcəlləsində məsafədən işin tənzimlənməsi, saatlıq əməkhaqqı sisteminin tətbiqi, bərabər dəyərli əməyə görə bərabər əməkhaqqının ödənilməsi, ailə üzvləri olan işçilərə və qadınlara ayrı-seçkiliyin aradan qaldırılması ilə bağlı müddəaların və sair məsələləri nəzərdə tutulan dəyişikliklərlə bağlı qanun layihələrinin bir hissəsi də müvafiq qurumlarla razılaşdırılaraq Nazirlər Kabinetinə təqdim edilib.
Bu barədə Əmək və Əhalinin Sosial Müdafiəsi Nazirliyindən APA-nın sorğusuna cavab olaraq, bildirilib.
Qeyd edilib ki, normativ hüquqi aktların layihələri aidiyyəti dövlət orqanları ilə razılaşdırıldıqdan sonra Nazirlik tərəfindən Nazirlər Kabinetinə təqdim olunur. Əmək Məcəlləsində dəyişiklik edilməsi ilə bağlı qanun layihələrinin bir hissəsi də müvafiq qurumlarla razılaşdırılaraq Nazirlər Kabinetinə təqdim edilib və bir qismi isə müvafiq qurumlarla razılaşdırılma mərhələsindədir. Təqdim edilmiş layihələrə hazırda baxılmaqdadır: “Layihələrlə bağlı yeniliklər olduqda ictimaiyyətə əlavə məlumat veriləcək”.
Qeyd edək ki, əmək və əhalinin sosial müdafiəsi naziri Anar Əliyev çıxışında demişdi ki, Azərbaycanda Əmək Məcəlləsində 200-ə yaxın dəyişikliklər üzərində iş aparılır. Bu dəyişikliklər əsasən məsafədən işin tənzimlənməsi, saatlıq əməkhaqqı sisteminin tətbiqi, bərabər dəyərli əməyə görə bərabər əməkhaqqının ödənilməsi, ailə üzvləri olan işçilərə və qadınlara ayrı-seçkiliyin aradan qaldırılması ilə bağlı müddəaları və sair məsələləri nəzərdə tutur.
Məsələ ilə bağlı açıqlama verən Vətəndaşların Əmək Liqasının sədri Sahib Məmmədov "Sherg.az"a söyləyib ki, fikrimcə, məsafədən əmək fəaliyyətinin təşkili işəgötürən üçün əlavə yük yaratmır:
“Lakin məsafədən işləyən şəxslərlə bağlı əməyin mühafizəsi və texniki təhlükəsizlik məsələlərinin necə təmin ediləcəyi hüquqi və praktiki baxımdan bəzi qeyri-müəyyənliklər doğurur. Çünki iş yerində işçinin sağlamlığına dəyən ziyana görə işəgötürən məsuliyyət daşıyır və üçüncü şəxslər qarşısında məsuliyyətini sığortalayır. Xüsusilə məsafədən əmək fəaliyyəti zamanı işçinin öz yaşayış sahəsində, avtomobilində və ya üçüncü tərəfə məxsus digər ofis və məkanlarda işlədiyi hallarda ona necə cavabdehlik daşıyacaq? Bu məsələ necə tənzimlənəcək? Baxın bu çətinlik yarada bilər. Qalan məsələlərdə isə işəgötürən müəyyən edir ki, hansı işçi məsafədən, hansı yerindən işləsin. Bu, işəgötürənin hüququdur və sadəcə onun hüquqi çərçivələri yaradılır. Saatlıq tariflərdə, iş rejimində və digər məsələlərdə heç bir dəyişiklik gətirməyəcək. Minimum əmək haqqı alan şəxslərdə isə nəsə dəyişə bilər”.
