İsrail druzlardan istifadə edərək, Suriyada sabitliyi pozmaq və Türkiyənin bu ölkədə hərbi-siyasi mövqeyini zəiflətmək istəyir
Suriya daxili təhlükəsizliyi təmin etmək üçün Türkiyədən rəsmi olaraq hərbi dəstək istəyib. Bu ölkənin Milli Müdafiə Nazirliyi məlumat yayıb ki, Suriya administrasiyası Türkiyəyə müdafiə qabiliyyətini gücləndirmək və bütün terror təşkilatları, xüsusilə İŞİD ilə mübarizə aparmaq məqsədilə rəsmi dəstək sorğusu ilə müraciət edib.
Bəyanata əsasən, Türkiyənin prioritet məqsədi Suriyanın siyasi birliyini və ərazi bütövlüyünü dəstəkləmək, həmçinin regionda davamlı sülhü təmin etməkdir. Ötən gün Türkiyə xarici işlər naziri Hakan Fidan da Suriya hərbi dəstək istəyərsə, Türkiyənin buna hazır olduğunu vurğulayıb.
Politoloq Məhəmməd Əsədullazadə Sherg.az-a deyib ki, İsrail Suriyada təhlükəsizliyin təmini və inkişafında maraqlı deyil. Ekspertin sözlərinə görə, İsrail druzlardan istifadə edərək, Suriyada sabitliyi pozmaq və Türkiyənin bu ölkədə hərbi-siyasi mövqeyini zəiflətmək istəyir:
"İsrail Türkiyənin Suriyada möhkəmlənməsinə qarşıdır. Ehtimal ki, ABŞ-nin birbaşa müdaxiləsi ilə Suriya və İsrail arasında danışıqlar aparılacaq. İsrail druzlara muxtariyyət tələb edir. Həmçinin, Suriyanın Colan təpələrindən imtinasını şərt kimi irəli sürür. İsrailin druzlara muxtariyyət tələbi Suriyanın Colan təpələrindən imtina etməsi ilə bağlı təzyiq siyasətidir. Danışıqlar baş tutarsa, Suriya Colan təpələrindən imtina edə bilər. İsrail druzlardan istifadə edir, ABŞ də bu planı dəstəkləyir. Ancaq ABŞ Suriyada sabitliyin və bütövlüyün qorunmasında maraqlıdır. Yaxın günlərdə ABŞ, Səudiyyə Ərəbistanı və Türkiyənin iştirakı ilə İsrail-Suriya arasında danışıqlar prosesi müsbət istiqamətdə inkişaf edəcək. Məhz Suriyanın Türkiyədən hərbi yardım istəməsi İsraili fakt qarşısında qoyur".
