Azərbaycan, İran və Rusiya hökumət nümayəndələrinin üçtərəfli görüşündə hansı məsələlərin müzakirə ediləcəyi açıqlanıb.
Bu barədə Baş nazirin müavini Şahin Mustafayev Bakıda keçirilən Azərbaycan, Rusiya və İran hökumət nümayəndələrinin üçtərəfli görüşündə bildirib.
Baş nazirin müavini bildirib ki, bugünkü görüş Azərbaycan, İran və Rusiya arasında nəqliyyat, energetika və gömrük sahələrində üçtərəfli əməkdaşlığın gündəliyində duran aktual məsələlərə həsr olunub: “Üçtərəfli formatda aparacağımız müzakirələr ölkələrimiz arasında ticarət-iqtisadi, nəqliyyat və enerji əlaqələrinin daha da genişlənməsi baxımından böyük əhəmiyyət kəsb edir. Əminəm ki, konstruktiv və müsbət məcrada keçəcəkmüzakirələrimiz üç ölkə arasında müvafiq sahələrdə qarşılıqlı faydalı əməkdaşlığın daha da möhkəmlənməsinə töhfə verəcək.
Azərbaycan-İran-Rusiya üçtərəfli əlaqələri kontekstində nəqliyyat, energetika və gömrük sahələrində əməkdaşlıq böyük əhəmiyyət kəsb edir”.
Politoloq Tural İrfan Sherg.az-a deyib ki, Azərbaycan, İran və Rusiya hökumət nümayəndələrinin görüşü hazırda çox önəmli əhəmiyyət kəsb edir:
"Rusiya ilə Azərbaycan aranda yaranmış vəziyyətin liderlər tərəfindən yoluna qoyulması, münasibətlərin yenidən inkişafını labüdləşdirir. Eyni zamanda qonşu və dost ölkə olan İranla da müvafiq iqtisadi, ticari və digər sahələrdə əlaqələrin inkişafı önəmlidir. Əsasən nəqliyyat və enerji sahələrində əlaqələrin genişləndirilməsi əhəmiyyətlidir. Hər üç ölkə arasında faydalı əməkdaşlığın gücləndirilməsi zəruridir. Xüsusən Qarabağın azad edilməsindən və sülh sazişinin paraflanmasından sonra Zəngəzur dəhlizinin açılması reallığı fonunda hər üç qonşu ölkənin yeni əlaqələrinin nəzərdən keçirilməsi, inkişafı, möhkəmləndirilməsi qarşıda daha geniş imkanlar açacaq. Gömrük, energetika, iqtisadi - ticari əlaqələrin hər üç ölkənin hikmət nümayəndələri ilə müzakirəsi eyni zamanda qarşılıqlı maraqların təmini müqabilində bölgədə daimi sülhün, sabitliyin də möhkəmlənməsi deməkdir. Bu kimi görüşlər bölgədə sabitliyin davamlı olmasına, münasibətlərin daha da yaxınlaşmasına və ən əsası isə iqtisadi, ticari sahələrdə üçtərəfli yeni əlaqələrin inkişafına töhfə verəcək".
