Kitab necə olmalıdır? Suala cavablar müxtəlif ola bilər. Öyrədən, yol göstərən, doğruları təlqin edən... Bir də var, düşüncə çırağı yandıran, həqiqət axtarışına çıxan, qəlbin, ürəyin oxuduğu kitab. İlahiyyatçı Ağa Hacıbəylinin “Həqiqətin izində” kitabı belələrindəndir. Kitabın təqdimatında çıxış edənlər elm, ürfan alimlərimiz onu məhz belə adlandırdılar. “Ən yaxşı kitab, sənin qəlbini, ürəyini oxuyan kitabdır” dedi, ziya sahiblərimiz.
Qeyd olundu ki, kitabda müxtəlif dini-mənəvi məsələlərə toxunulur, müəllif problemləri və yaradılış həqiqətlərinə dair mövzuları vəhdət halında təqdim edərək mübahisəli məqamlarda ümmətin dini-ictimai birliyini, həmrəyliyini ifrat və təhrifə yol vermədən əsaslandırır. Kitabda müəllifin yanaşması ilə müxtəlif islam fikir məktəblərinə baxış mötədil xarakter alır, onlar arasındakı vəhdətin Quran nuru ilə təmin edilməsinin mümkünlüyünə diqqət yönəldilir. Vurğulanır ki, müharibə, çəkişmə və didişmələrin, aclıq, səfalətin hökm sürdüyü dünyamızda təkcə müsəlmanlar arasında qardaşlıq münasibətlərinin təşəkkül və inkişafı deyil, bəşəriyyətin xilası ümumən cəmiyyətin, insanların bir-birinə şəfqət nəzərləri ilə baxması hava-su qədər vacibdir. Çıxışçılar bildirdi ki, bu kitab daşıdığı yüksək missiya – həqiqət axtarışları baxımından oxucunun nəinki masaüstü, ovuc içi kitabı olmalıdır. Çünki həqiqət axtarışları hər zaman Haqda bitir. Haqqı tapansa haqq yoldan sapmaz. Bəşəriyyətin, insanlığın buna çox ehtiyacı vardır.
