Millət vəkili: "5-ci kolonun nəzarətində olan saytlar cəmiyyətdə panika yaradırlar"
“Reket jurnalistikası cinayətkar fəaliyyətdir”. Bu barədə Azərbaycanın Baş prokuroru Kamran Əliyev bildirib. O qeyd edib ki, bəzən sosial media istifadəçiləri, yaxud mətbu orqanların əməkdaşları özlərini tam hazırlıqlı “hüquqşünas” kimi hesab edirlər, hüquqi məsələlərlə bağlı qəti fikirlər yürüdürlər. Baş prokurorun sözlərinə görə, bu, yolverilməzdir. Çünki hüquq elmi kifayət qədər mürəkkəb elmdir: “Hüquqi məsələlər, sübutlar, sübutların təhlili, qiymətləndirilməsi ilə bağlı müstəntiqlər, prokurorlar, hakimlər tərəfindən kifayət qədər çoxşaxəli dəyərləndirmə həyata keçirilir.
İncəlikləri, sübutları bilmədən, o cümlədən şərti olaraq “Tərtər işi” kimi işlərlə bağlı bəzən bu cür fikirlərin yürüdülməsi yolverilməzdir. Hesab edirəm ki, bu sahədə müəyyən tədbirlər planı hazırlamalıyıq və onu jurnalistlərlə, media orqanları ilə birlikdə həyata keçirməliyik”. Kamran Əliyev vurğulayıb ki, “reket jurnalistikası” yalnız jurnalistikaya aid deyil: “Reket jurnalistikası da şərti termindir. Əslində, burada söhbət hədə-qorxu ilə tələb etmədən gedir. Bəzən jurnalist fəaliyyətindən istifadə etməklə, yaxud da jurnalistlərin öz fəaliyyəti zamanı bu hallar baş verir. Bu, tək jurnalistlərlə bağlı deyil, bəzən sosial media istifadəçiləri tərəfindən də bu kimi hallara yol verilir. Konkret olaraq qanunda bunun adı hədə-qorxu ilə tələb etmə adlanır. Belə hallar yolverilməzdir. Artıq bu, jurnalistika fəaliyyəti ilə heç bir əlaqəsi olmayan sırf cinayətkar bir fəaliyyətdir. Bu kimi faktları aşkarlayıb, şəxsləri məsuliyyətə cəlb edirik”.
Baş prokurorun diqqət çəkdiyi məqamı “Şərq”ə dəyərləndirən Milli Məclisin üzvü, Yeni Azərbaycan Partiyasının İdarə Heyətinin üzvü Cavid Osmanov deyib ki, Azərbaycan jurnalistikası böyük, keşməkeşli yol keçib. Parlament üzvü bildirib ki, müstəqilliyimiz yenicə bərpa olunduğu illərdə bir çox “reket jurnalistlər” müxtəlif vasitələrlə insanlara şər-böhtan ataraq onlardan öz şəxsi mənafeləri üçün istifadə edirdilər:
“Azərbaycan hüquqi-demokratik dövlət kimi inkişaf yolunu qət etdikcə, bu istiqamətdə də mühüm tədbirlər görüldü. Son illərdə “Media haqqında” qanunun qəbul olunmasını, o cümlədən Media İnkişaf Agentliyinin yaradılmasını və digər çoxsaylı addımları göstərmək olar. Çox təəssüf ki, hələ də “reket jurnalistika” var və onlar öz qaragüruh fəaliyyəti ilə çalışırlar ki, ayrı-ayrı şəxsləri şantaj etsinlər. Ona görə də durmadan şər-böhtan kampaniyası aparırlar. Bəzi saytlarda, həmçinin sosial şəbəkələrdə də bu, öz əksini tapır. Düşünürəm ki, bunun arxasında böyük ölçüdə anti-Azərbaycan qüvvələrin fəaliyyəti durur. Xarici ölkələrdə oturaraq, özlərini “bloqer” adlandıranların, ermənipərəst qüvvələrə, anti-Azərbaycan dairələrə xidmət göstərənlərin, ölkədəki 5-ci kolonun nəzarətində olan bəzi saytların, “hüquqşünasların” insanları yanlış yönə sövq etməsi, təxribat xarakterli xəbərlərlə cəmiyyətdə panika yaratması yolverilməzdir. Belə şəxslər hüquq qarşısında mütləq cavab verməlidir. Azərbaycan Ordusuna, bütövlükdə dövlətçiliyimizə qarşı şər-böhtan kampaniyasının aparılması, ayrı-ayrı ictimai şəxslərin qaralanması, şəhid ailələrindən və qazilərdən çirkin məqsədlər üçün istifadə cəhdləri olduqca təhlükəli tendensiyadır. Son günlər ordumuz haqqında yanlış dezinformasiyaların yayılması da “reket jurnalistika”nın tərkib hissəsidir”.
Deputat əminliklə vurğulayıb ki, bu cəhdlərin arxasında anti-Azərbaycan dairələrin nökərinə çevrilmiş radikal qüvvələr dayanır:
“Xaricdə öyrədilərək daxilimizə göndərilmiş və “ictimai fəal” kimi ortalığa atılmış ünsürlərin, ermənipərəst dairələrin nəzarətində olan şəbəkələrin fəaliyyətinin əsas məqsədi güclü Azərbaycanın qurulması istiqamətində atılan böyük addımları, xalqımızın həmrəyliyini pozmaqdır. Xalq-iqtidar birliyinə yönəlmiş cəhdlərdir. Buna qarşı cəmiyyət olaraq hər birimiz amansız mübarizə aparmalı, ayıq-sayıq olmalıyıq. Digər tərəfdən hüquqi tənzimləmələr olmalı, belə şəxslərə qarşı hüquqi müstəvidə mübarizə aparılmalıdır”.
