Ermənistanın xarici işlər naziri Ararat Mirzoyan və Avropa Komissiyasının vitse-prezidenti Marqaritis Şinas Brüsseldə İrəvanla Aİ ölkələri arasında viza rejiminin liberallaşdırılması məsələsini müzakirə edib.
APA xəbər verir ki, bu barədə Ermənistan Xarici İşlər Nazirliyinin mətbuat xidməti məlumat yayıb.
"Viza rejiminin liberallaşdırılması üzrə dialoqun başlanmasının müsbət dinamikasını alqışlayan Ararat Mirzoyan vurğulayıb ki, bu istiqamətdə yekun qərar Ermənistan və Aİ arasında əməkdaşlığın dərinləşməsində və xalqlararası əlaqələrin inkişafında mühüm rol oynayacaq", - bəyanatda deyilir.
XİN bildirib ki, tərəflər regional təhlükəsizlik məsələlərini də müzakirə ediblər.
"Mirzoyan Ermənistan Respublikasının regionda uzunmüddətli sülhün bərqərar olması ilə bağlı baxışını təqdim edib", - açıqlamada deyilir.
