Ehtimal ki, Kremldən hər hansı qrup təlimat verib ki, konsul da bu prosesə qoşulsun
Ermənistanın Yekaterinburqdakı fəxri konsulu Narek Spartakyan geri çağırılıb. Bildirilir ki, Spartakyan İrəvan hakimiyyəti ilə erməni kilsəsi arasında yaranan münaqişədə rəsmən ikincini dəstəkləyib. Spartakyan özü qeyd edib ki, Yekaterinburqda yaşayıb və yaşamaqda davam edir və o, fəxri konsul statusu olmasa belə, Sverdlovsk sakinləri və erməni icması üçün lazım olan hər şeyi edəcəyini deyib: "Mən bütün ermənilərin mənəvi birliyinin mühüm təməli kimi Erməni Apostol Kilsəsinə qarşı hər hansı hərəkəti yolverilməz hesab edirəm". Məlumat üçün bildirək ki, Spartakyan Yekaterinburqda böyüyüb və 2018-ci ildə, 28 yaşı olanda fəxri konsul olub. Əvvəlcə onun konsulluq dairəsinə yalnız Sverdlovsk vilayəti daxil idi, lakin sonralar Perm və Çelyabinsk vilayətləri də daxil edilib.
"Alyans" Strateji Araşdırmalar Mərkəzinin rəhbəri Abutalıb Səmədov deyib ki, Yekaterinburqdakı fəxri konsulun geri çağırılması Rusiyaya qarşı addımdır. Siyasi şərhçi bildirib ki, Rusiya aşkar şəkildə Ermənistan Baş naziri Nikol Paşinyanı devirməyə, hakimiyyətdən salmağa çalışır:
"Hətta Rusiya mümkün olacağı təqdirdə Paşinyanı 2026-cı il parlament seçkilərinə kimi devirmək niyyəti güdür. Paşinyan hökumətinə qarşı çıxan qüvvələr Kilsə və böyük biznesləri olan iş adamlarıdır. Fəxri konsul öz tərəfini seçib və mövqeyini açıqlayıb. Ola bilsin, Kremldən yönləndirmə olub və nəticədə konsul açıq şəkildə ifadə edib ki, Paşinyanın atdığı addımları, Kilsəyə qarşı mübarizəsini qəbul etmir. Belə durumda Nikol Paşinyan necə addım ata bilər ki?! Hakimiyyət komandasında kimsə siyasi rəqibin düşərgəsinə keçibsə, dərhal vəzifəsindən uzaqlaşdırılmalıdır. Nəzərə alaq ki, konsul Rusiyanın üç bölgəsində - Perm, Çelyabinsk və Sverdlovskidə fəaliyyət göstərirdi. Ehtimal ki, Kremldən hər hansı qrup təlimat verib ki, konsul da bu prosesə qoşulsun. Bu hadisənin presedent olması da mümkündür. Real mənzərə odur ki, Moskva Paşinyanı devirmək üçün hər şey edəcək, çünki başqa yolu yoxdur. Paşinyan Rusiya ilə körpüləri yandırıb və geri qayıtmağa yer qoymayıb. Bu səbəbdən nəyin bahasına olursa-olsun, Kreml Paşinyan səhifəsini bağlamağa çalışır".
