İngiltərənin “The Economist” jurnalı, Türkiyə Prezidenti Rəcəb Tayyib Ərdoğanı “Avropanın mümkün xilaskarı” kimi təqdim edib. Xəbərdə “Qorxmayın, avropalılar. Arxanızda Rəcəb Tayyib Ərdoğan var!” ifadələrinə yer verilib.
Sherg.az xəbər verir ki, Londondakı “The Economist” jurnalı, Prezident Rəcəb Tayyib Ərdoğanı “Avropanın mümkün xilaskarı” adlandırıb.
Jurnalın xəbərində belə yazılıb:
“Amerika geri çəkilir. Rusiyadan gələn təhdid artır. Ukrayna müdafiədədir. Yeni xərcləmə vədlərinə baxmayaraq, silah istehsalı rahatlıq üçün çox azdır. Qorxmayın, avropalılar. Arxanızda Rəcəb Tayyib Ərdoğan var.”
“Türkiyənin prezidenti və Avropanın mümkün xilaskarı 11 aprel tarixində ‘Avropanın təhlükəsizliyi Türkiyəsiz təsəvvür edilə bilməz’ dedi,”- qeyd edən “The Economist”, təhlükəsizlik əməkdaşlığı, yenidən silahlanma və Ukrayna məsələlərində Avropanın Türkiyənin yardımına hər zamankından daha çox ehtiyacı olduğunu vurğulayıb.
Məqalədə Türkiyənin müdafiə sənayesi ilə bağlı bunlar bildirilib:
“Ölkənin silah sənayesi sürətlə inkişaf edir. Zirehli texnikalar, hücum və müşahidə təyyarələri, döyüş gəmiləri, yüngül silahlar və sursatlar Türkiyədəki montaj xəttindən çıxır. Gecikmələrə baxmayaraq, Türkiyənin “Altay” döyüş tankı və “Kaan” adlı “görünməz” döyüş təyyarəsinin bu onilliyin sonuna qədər xidmətə girməsi gözlənilir.”
Avropada Türkiyə ilə əməkdaşlığa marağın artdığına diqqət çəkilən xəbərdə qeyd edilib ki, Türkiyənin pilotsuz uçuş aparatları istehsalçısı “Baykar” yaxın günlərdə İtaliyanın müdafiə nəhəngi “Leonardo” ilə birgə müəssisə sazişi imzalayıb.
Məqalədə həmçinin vurğulanıb ki, Avropa Ukrayna məsələsində də Ərdoğanın dəstəyinə bel bağlayır.
