“İran nüvə silahına malik olmamağı qəbul edib”
ABŞ Prezidenti Donald Tramp İranla bağlı diqqətçəkən açıqlamalar verib. O, müsahibəsində bildirib ki, Tehran nüvə silahına sahib olmamaq prinsipini qəbul edib və tərəflər arasında aparılan danışıqlarda irəliləyiş var.
Sherg.az xəbər verir ki, Trampın sözlərinə görə, İran rəhbərliyi hazırda Vaşinqtonla danışıqlar aparır və o, yaxın zamanda İran lideri ilə birbaşa görüş də keçirə bilər.
“İran lideri hazırda bizimlə danışıqlar aparır. Hətta müəyyən mərhələdə onunla görüşə də bilərəm. İran nüvə silahına malik olmamağı qəbul edib”, - deyə ABŞ prezidenti bildirib.
Tramp, İsrailin Baş naziri Benjamin Netanyahu haqqında səsləndirdiyi sərt ifadələri təsdiqləyib. Bununla belə, o, Netanyahu ilə əməkdaşlığın yüksək səviyyədə davam etdiyini vurğulayıb.
“Mən müharibə dövrünün prezidentiyəm, o isə müharibə dövrünün baş naziridir. Birlikdə çox yaxşı işləyirik. "Bibini" çox sevirəm”, - deyə Tramp qeyd edib.
ABŞ lideri İsrailin Livan istiqamətində davam edən hərbi fəaliyyətindən müəyyən narahatlıq keçirdiyini də etiraf edib. Onun fikrincə, regiondakı gərginlik daha geniş sülh razılaşmalarına mane ola bilər.
Tramp İranla aparılan danışıqların sürətlə irəlilədiyini bildirərək yaxın müddətdə razılaşmanın əldə olunacağına inandığını deyib.
“Danışıqlar sürətlə inkişaf edir. İran nüvə silahına sahib olmayacaq və bununla yanaşı bir çox müsbət hadisələr baş verəcək”, - deyə o vurğulayıb.
ABŞ prezidenti həmçinin ölkə iqtisadiyyatının dayanıqlığını qoruduğunu, enerji bazarları ilə bağlı bəzi bədbin proqnozların özünü doğrultmadığını bildirib.
Trampın açıqlamaları ABŞ-İran münasibətlərində son aylarda müşahidə olunan diplomatik fəallığın fonunda xüsusi diqqət çəkir və tərəflər arasında mümkün nüvə razılaşması ilə bağlı müzakirələri yenidən gündəmə gətirir.
