Dünyada ətraf mühitin çirklənməsi, azalan təbii ehtiyatlar və artan tələbat fonunda daynıqlı inkişaf məsələlərinə (DİM) nail olmaq üçün yaşıl iqtisadiyyata keçid böyük əhəmiyyət kəsb edir. Azərbaycan iqlim dəyişikliklərinin təsirlərini yumşaltmaq üçün addımlar atır, kütləvi ağacəkmə tədbirləri həyata keçirilir. Təkcə bu il ərzində işğaldan azad olunan ərazilər də daxil olmaqla 3 milyona yaxın ağacın əkilməsi hədəfi qoyulub və artıq biz buna nail olmaq üzrəyik.
“APA-Economics” xəbər verir ki, bunu ekologiya və təbii sərvətlər nazirinin müavini Umayra Tağıyeva “Dayanıqlı İnkişafa dair 2-ci Bakı Forumunda çıxışı zamanı deyib.
O bildirib ki, işğaldan azad olunan ərazilərdə iqlim dəyişikliyinin təsirlərinin azaldılması üçün addımlar atılır: “Bu ərazilərin yaşıl enerji zonasına çevrilməsi və burada karbon neytrallığı hədəfinə nail olunması istiqamətində siyasət həyata keçirilir”.
O qeyd edib ki, Azərbaycan zəngin günəş və külək ehtiyatlarına malik olmaqla, böyük bərpa olunan enerji potensialına malikdir: “2030-cu ilə qədər ölkənin ümumi enerji balansında bərpa olunan enerji üzrə qoyuluş gücü payının 30%-ə çatdırılması əsas hədəfdir. Bu hədəf özəl sektor və investorlar üçün uzunmüddətli baxışı təmin edir və yeni layihələrin inkişafına təkan verir”.
“Xüsusilə karbon tutumlu sektorlarda emissiyaların azaldılması tədbirləri və yaşıl enerji layihələri prioritetləşdirilməlidir”, - deyə o əlavə edib.
Umayra Tağıyeva bildirib ki, Azərbaycanda kənd təsərrüfatı iqlim dəyişikliyinə ən həssas sahə kimi müəyyən edilib.
