Rusiyanın bu istəyi daha çox Vaşinqtonda əldə olunan razılaşmaya mane olmaq cəhdidir
Rusiya "3+3" platformasını mütəmadi olaraq gündəmə gətirir. Ötən gün Moskva "3+3" regional məşvərət platformasının dördüncü nazirlər görüşünün 2025-ci ilin sonuna qədər keçirilməsini dəstəklədiyini açıqlayıb. Rusiyanın Ermənistanda səfiri Sergey Kopırkin deyib ki, hazırda Ermənistan və Azərbaycan arasında əlaqə saxlayırlar, çünki orada növbəlilik məsələsi var:
"Yəni həm Ermənistan, həm də Azərbaycan tərəfi belə bir iclasa ev sahibliyi etməyə hazırdır, onlar növbəlilik qaydasını razılaşdırmalıdır, biz də bu istiqamətdə hər cür köməklik edirik". Səfirin sözlərinə görə, bu platformanın Türkiyə və İran tərəfi ilə əlaqə saxlayan bütün iştirakçıları hesab edirlər ki, bu, faydalı formatdır və regional problemlərin həllində region dövlətlərinin özləri mühüm rol oynamalıdır: "Bu, bizim prinsipial mövqeyimizdir. Əlbəttə ki, üçüncü ölkələrin iştirakı dəyərli ola bilər, lakin bu iştirak reallıqların və regional oyunçuların maraqlarının başa düşülməsi üzərində qurulmalıdır".
Siyasi şərhçi Həsrət Rüstəmov Sherg.az-a deyib ki, "3+3" formatı bir neçə il bundan əvvəl irəli sürülmüşdü. Ekspert bildirib ki, ötən bu illər göstərdi ki, potensialı kifayət qədər olsa da, nəzərdə tutulan ölkələr arasındakı münasibətlər və ziddiyyətlər bu formatın işləməsinə imkan vermədi:
"Xüsusilə də Rusiyanın bu regiona keçmiş imperialist maraqlarını dəyişməməsi və İranın həm region, həm də dünyadakı yanlış mövqeləri bu ideyanı mənasız, ölü doğulan proyektə çevirdi. İndi Rusiyadan bu formatla bağlı fəallığın yaranması da, fikrimcə, bu sahədə irəliləyiş əldə etmək məqsədi güdmür. Bu, daha çox Donald Trampın vasitəçiliyi ilə Zəngəzur dəhlizinin açılması və Cənubi Qafqazda sülh istiqamətində bu yaxınlarda Vaşinqtonda əldə olunan razılaşmaya mane olmaq cəhdidir. Elə hesab edirəm ki, Azərbaycan bölgədəki vəziyyətin normallaşmasına və sülhə xidmət edən, artıq əldə olunmuş Vaşinqton razılaşmasını əsas götürərək siyasət yürütməli, regional əməkdaşlıq, iqtisadi əlaqələr baxımından isə ikitərəfli münasibətlərin inkişafına daha çox diqqət etməlidir. Rusiyanın və İranın iştirakı ilə ən azı yaxın gələcəkdə ciddi bir regional formatın real və işlək olacağına inanmaq bu ölkələrin qeyri-sağlam münasibəti baxımından qeyri-mümkündür".
