Onu sakitləşdirmək üçün əl-qolunu, ayaqlarını ayaqqabı bağı ilə sarıyıblar
Sərnişin təyyarəsində gözlənilməz hal yaşanıb. Denverdən Hyustona uçan "Frontier Airlines" təyyarəsində bir sərnişin aqressiv davranışlar sərgiləyərək qarşısındakı oturacağı bir neçə dəfə yumruqlayıb. Sonra ayağı ilə pəncərəni sındırıb.
“Sherg.az” “Milliyet.com.tr”yə istinadən qeyd edir ki, təyyarədəki digər sərnişinlər onu zərərsizləşdirməyə çalışıb. Və onun əl-qolunu, ayaqlarını ayaqqabı bağı ilə sarıyıblar. Hadisə sərnişin təyyarəsinin Hyustona çatmasına 20 dəqiqə qalmış baş verib. Hələlik şəxsiyyəti müəyyənləşdirilməyən sərnişin əvvəlcə qarşısındakı oturacağı yumruqlamağa başlayıb. Sakitləşməyən sərnişin daha sonra təyyarənin şüşəsini təpiklə vuraraq içəridəki şüşəni sındırıb. Kişinin yanında və qarşısında əyləşən sərnişinlər mümkün təhlükədən xilas olmaq üçün yerlərindən qalxıblar.
Sərnişin çılğınlaşaraq pəncərəni zədələyərkən təyyarədəki digər sərnişinlər buna müdaxilə edib. Araya girən 6 sərnişin kişini bağlamaq üçün ayaqqabı bağı və plastik qandaldan istifadə edib. Zərərsizləşdirilən hücumçu uçuşun qalan yarım saatı ərzində müvəqqəti olaraq təmkinli vəziyyətdə qalıb. Təyyarə Buş Beynəlxalq Hava Limanına endikdən sonra hücum edən şəxs polis tərəfindən nəzarətə götürülüb. Hyuston polisi həmin şəxsin adını və hava hücumunun səbəbini açıqlamayıb. Məlumata görə, "Frontier Airlines" bu şəxsə qarşı hələ ittiham irəli sürməyib, lakin araşdırma aparmaq üçün FTB ilə əlaqə saxlanılıb.
