“Problem araşdırılmalı, səbəb hər nədirsə keçmiş döyüşçü, şair Həsən Kürə lazımi dəstək göstərilməlidir”
İntihara cəhd etmiş şair Həsən Kürün vəziyyəti açıqlanıb. Sabunçu xəstəxanasının mətbuat xidmətindən bildirilib ki, xəstənin vəziyyəti hazırda ağır stabildir. H.Kürə qapalı kəllə-beyin travması, sol bud sümüyünün qapalı sınığı, kəllə sümüyünün sınığı diaqnozu qoyulub və zəruri tibbi yardımlar göstərilib.
Hazırda müalicəsi Cərrahi profilli reanimasiya şöbəsində davam etdirilir. Hadisə Sabunçu rayonuna yerləşən “Sevinc Mall” ticarət mərkəzində baş verib. Gənc şair Həsən Kür özünü ticarət mərkəzinin 3-cü mərtəbəsindən atıb. Həsən Kürün maddi problemlərə görə intihara cəhd etdiyi bildirilir.
İstər şair olsun, istər qeyrisi, gənclər niyə intihar yolunu seçir? Buna səbəb yalnız maddi çətinlikdirmi, yaxud xarakter zəifliyi, hisslərə hakim ola bilməmək, özünü realizə etmək bacarığının yoxluğu?
Həsən Kürün intihar cəhdi barədə fikirlərini “Sherg.az”a bildirən yazıçı, şair, tərcüməçi və ssenarist Cəlil Cavanşir qeyd etdi ki, intihar onun üçün həssas məsələdir və müzakirəsinə qarşıdır:
- Vətən Müharibəsi iştirakçısı, şair Həsən Kür maddi sıxıntılar ucbatından intihara cəhd edib, vəziyyəti ağırdır. Həsəni dərindən tanımıram, amma problemləri, sıxıntıları mənə tanışdır. Bir neçə dəfə feysbukda danışmışıq. Bir ara bir "qht" vardı, müharibədə iştirak edən qaziləri kurasiyasına götürüb, tədbirlərdə şeir oxudur, kitab sərgilərində gəzdirirdilər. Arada almanax da çap etmişdilər. Görəsən müharibə iştirakçısı olan qazilərdən pul qazanan, onların sayəsində dövlətdən qrant alan "qht" sədri Həsənlə sıxıntıları barədə danışıbmı? Ümid edirəm danışıb... Ehtiyac olanda, sərf edəndə şairdən, yazıçıdan, qazidən istifadə edib, sıxıntısı olanda iqnor edənlər saysız-hesabsızdır. Ümumiyyətlə, intihar həssas məsələdir. Bu barədə danışmaq çox çətindir. Problem araşdırılmalı, səbəb hər nədirsə keçmiş döyüşçü, şair Həsən Kürə lazımi dəstək göstərilməlidir.
Aşağıdakı misraları isə hadisədən saatlar öncə yuxuda yazıb, sonra oyanan kimi kağıza köçürmüşəm:
Qıpqırmızı qan laladı
Köpəklər qanın yaladı
Gəlib soruşan olmadı
Görəsən dərdi nə idi?
Damdan atılan adamın...
