Məhkəmə Gürcüstanın sabiq Prezidenti Mixeil Saakaşvilini külli miqdarda dövlət vəsaitini mənimsəmək ittihamı ilə 9 il müddətinə azadlıqdan məhrum edib.
Qərar bir neçə dəqiqə əvvəl Tbilisi Şəhər Məhkəməsində qəbul edilib. Hakim Badri Koçlamazaşvili Saakaşvilinin 9 milyon lari dövlət vəsaitini mənimsəməkdə təqsirli bilib.
İclasda Saakaşvili ilə yanaşı Dövlət Xüsusi Mühafizə Xidmətinin sabiq rəisi Teymuraz Canaşiyaya qarşı iş üzrə irəli sürülmüş ittiham dəyişdirilib və o, 300 min lari cərimələnib.
Qeyd edək ki, təqsirləndirilən şəxslər iclasda iştirak etməyiblər. Saakaşvili və Canaşiya iş üzrə özlərini təqsirli bilmirlər.
Politoloq Tural İsmayılov "Sherg.az"a bildirib ki, Mixail Saakaşvilinin Gürcüstanda həbsdən azad ediləcəyini düşünmək reallıqdan uzaq olardı:
"Gürcüstanın sabiq prezidentinə qarşı bir sıra ciddi ittihamlar irəli sürülüb və məhkəmə istintaqı zamanı bu ittihamların real əsaslara söykəndiyini təsdiqləyən məqamlar ortaya çıxıb. Saakaşvilinin hakimiyyətdə olduğu dövrdə dövlət büdcəsindən vəsaitlərin mənimsənilməsi ilə bağlı adı hallanırdı. Üstəlik, o, hazırkı hakimiyyətdən əvvəlki hökumət dövründə də artıq həbs olunmuşdu.
Bundan əvvəlki dövrdə dəfələrlə mövcud hakimiyyətlə əks mövqelərdə dayanan sabiq prezident Salome Zurabişvili açıq şəkildə bəyan etmişdi ki, Saakaşvilinin əfv olunma ehtimalı son dərəcə aşağıdır. Bu baxımdan, onunla bağlı çıxarılan məhkəmə hökmü gözlənilən idi və Gürcüstanın daxili siyasi proseslərinin məntiqinə uyğun gəlirdi".
Politoloqun sözlərinə görə, Gürcüstanın gələcək siyasi kursunu yalnız Saakaşvilinin həbsi üzərindən şərh etmək olmaz:
"Faktiki olaraq, rəsmi Tbilisi bu gün imperializmin təzyiqlərinə qarşı dayanan, milli maraqlara əsaslanan güclü dövlətçilik formalaşdırıb. Ayrı-ayrı şəxslərin və ya siyasi fiqurların hüquqi müstəvidə müzakirəyə çıxarılması ölkənin ümumi taleyinə mənfi təsir göstərə bilməz. Gürcüstan, xüsusilə xarici təsirlər fonunda kifayət qədər möhkəm dövlət institutları quraraq daxili sabitliyini təmin etməyi bacarıb".
