Rusiya ilə Ukrayna arasında İstanbulda keçirilən danışıqlardan sonra Kremlin mövzu ilə bağlı açıqlaması yayılıb.
Sherg.az xəbər verir ki, Kremlin sözçüsü Dmitri Peskov, Ukrayna ilə bağlı danışıqlarda sürətli irəliləyiş gözləməyin düzgün olmadığını, müharibəni sonlandırmaq üçün razılığa gəlməyin son dərəcə mürəkkəb olduğunu bildirib.
Prezident Rəcəb Tayyib Ərdoğanla planlaşdırılan bir görüşün hələlik olmadığını bildirən Peskova, ABŞ Prezidenti Donald Tramp, Rusiya Prezidenti Vladimir Putin və Ukrayna Prezidenti Volodimir Zelenski arasında mümkün görüşlə bağlı da sual verilib. Peskov, belə bir görüşün yaxın gələcəkdə mümkün olmadığını söyləyib. Kremlin sözçüsü əlavə edib ki, Ukrayna məsələsində ABŞ ilə təmaslar davam edəcək.
Kreml tərəfindən edilən açıqlamada Tramp ilə Putin arasında gələcəkdə keçirilə biləcək konkret görüşlərlə bağlı hələlik bir razılığın əldə olunmadığı, Putinin müxtəlif yüksək səviyyəli görüşlərə hazır olduğu, lakin bu görüşlərin öncədən yaxşı hazırlanmalı olduğu qeyd edilib. Peskov, Rusiyanın İstanbulda Ukrayna ilə aparılan danışıqlarda əldə olunan razılaşmalara sadiq qalacağını bildirib.
Peskov, Ukraynanın Rusiyadakı bombardman təyyarələrinə dair də açıqlama verib. O, bu barədə Rusiya Prezidenti Putinə baş verənlərlə bağlı dərhal məlumat verildiyini və mövzu ilə bağlı araşdırma başladıldığını bildirib.
Kremlin sözçüsü, Ukrayna məsələsində hər hansı bir güzəştə getməyə hazır olub-olmadıqları ilə bağlı sualı cavablandırmaqdan imtina edib və bu məsələnin qapalı qapılar arxasında müzakirə edilməli olduğunu vurğulayıb.
