Tələblərə səhlənkar yanaşan tikinti şirkəti məhkəməyə verildi
İstanbulun Sultanbəyli səmtindəki Yavuz Səlim məhəlləsində aparılan inşaat işləri zamanı çirkab suların toplandığı çuxurdan körpə meyiti tapılıb. Araşdırmalar zamanı məlum olub ki, çuxurdan çıxarılan meyit 4 yaşlı Adəm Kavçinə məxsusdur. “Şərq” “NTV.com.tr”yə istinadən bildirir ki, sözügedən ərazidəki inşaat işləri 3 ay əvvəl dayandırılıb. İnşaat işləri zamanı hörülmüş istinad divarının önündə isə böyük çuxur yaranıb. Ətrafda yaşayanlar tikinti şirkətindən çuxurun bağlanmasını tələb etsələr də, onların şikayətinə məhəl qoyulmayıb. Zamanla yağış suları çuxura dolub. Valideynlərinin iddiasına görə, 4 yaşlı Adəm küçədə oynayarkən yağış suyu ilə dolu çuxura düşərək boğulub. Körpənin atası Erhan Kavçin bildirib ki, iftar saatı yaxınlaşdığında küçəyə çıxaraq oğlunu səsləyib, uşaq səs verməyincə, axtarışlara başlanılıb. Nəhayət, Adəmin cansız bədəni su dolu çuxurda tapılıb. Uşağın meyiti tibbi ekspertizaya aparılıb və onun boğularaq öldüyü təsdiqlənib. Kavçin ailəsi tikinti şirkətini insanların həyatına təhlükə yaratdığı üçün məhkəmə verib. Körpənin dayısı da “bu çuxur hələ də qapanmayıb. Bizim ürəyimiz yandı, başqa kimsənin də ürəyi yanmasın. Bu səhlənkarlıq, təhlükəni görməzdən gəlməkdir. Tədbir görülməlidir”, deyib.
