Gürcüstan Daxili İşlər Nazirliyi Devdorak buzlağının vadisində suyun səviyyəsinin yüksəlməsi səbəbilə “Dariali” sərhəd-keçid məntəqəsində olan insanların təxliyə edildiyini açıqlayıb.
Məlumata görə, çayın mənsəbində suyun səviyyəsinin artması müşahidə edilib. Təhlükəsizlik məqsədilə keçid məntəqəsindəki vətəndaşlar, patrul polisi, gömrük və sərhəd polisi əməkdaşları, eləcə də özəl şirkətlərin nümayəndələri təhlükəsiz əraziyə aparılıb.
Hadisə ilə əlaqədar avtomobillərin hər iki istiqamətdə hərəkəti məhdudlaşdırılıb.
Devdorak buzlağı Gürcüstanda Kazbek dağının şimal yamacında, Gürcüstan Hərbi Yolunun yaxınlığında yerləşir. Ərazi vaxtaşırı sel və daşqınlarla üzləşir.
