VI çağırış Milli Məclisin deputatı Fazil Mustafaya qarşı sui-qəsd cəhdində təqsirli bilinən şəxslərə hökm oxunub. Bakı Ağır Cinayətlər Məhkəməsində hakim Elnur Nuriyevin sədrliyi ilə keçirilən məhkəmə prosesdə Azər Səricanov ömürlük, Səbuhi Şirinov 20 il, Rəşad Əhmədov 19 il, Elşad Əsgərov 18 il, Emin Əliyarov isə 4 il azadlıqdan məhrum edilib. Xatırladaq ki, hadisə ötən il martın 28-də Sabunçu rayonu Zabrat qəsəbəsində baş verib. Milli Məclisin deputatı Mustafa Fazil Qəzənfər oğluna yaşadığı evin qarşısında “Kalaşnikov” avtomat silahından atəş açılaraq sui-qəsd cəhdi edilib.
Faktla bağlı Dövlət Təhlükəsizliyi Xidmətinin İstintaq baş idarəsində Cinayət Məcəlləsinin 277 (dövlət xadiminin və ya ictimai xadimin xidməti və ya siyasi fəaliyyətinə son qoymaq və ya bu fəaliyyətə görə qisas almaq məqsədilə onun həyatına sui-qəsd etmə), 228.2.1 (qabaqcadan əlbir olan bir qrup şəxs tərəfindən qanunsuz olaraq odlu silah, onun komplekt hissələrini, döyüş sursatı əldə etmə, saxlama, daşıma və gəzdirmə) və digər maddələri ilə cinayət işi başlanılıb.
Daxili İşlər Nazirliyi və Dövlət Təhlükəsizliyi Xidmətinin əməkdaşlarının birgə keçirdiyi əməliyyat-axtarış tədbirləri nəticəsində terror aktını törətməkdə şübhəli bilinən şəxslər tutularaq istintaqa təhvil verilib. Dövlət Təhlükəsizliyi Xidmətində aparılan cinayət işi üzrə Emin Əliyarov, Rəşad Əhmədov, Azər Səricanov, Elşad Əsgərov, Səbuhi Şirinovun barəsində ittiham elan edilib.
“sherg.az” xəbər verir ki, millət vəkili Fazil Mustafa mövzu ilə bağlı hələ ki fikir söyləməyi məqsədəuyğun saymadığını bildirib.
Hüquq müdafiəçisi Novella Cəfəroğlu isə vurğulayıb ki, hadisə ilə bağlı ömürlük həbs qərarı çox düzgün addımdır:
“Həmin terrakt təkcə Fazil Mustafaya deyil, ümumən Azərbaycana və bu milllətə qarşı olan hadisə idi. Fazil bəy, İranın siyasətindən ən çox danışan şəxs idi. Ona görə də Fazil Mustafanı hədəf götürdülər. Bu Azərbaycana qarşı düşmənçilikdir. Sözügedən hadisə sui-qəsd yox, terrordur. Azərbaycan dövlətçiliyinə qarşı olunan bütün terror hadisələrinin iştirakçılarına ömürlük həbs vermək lazımdır”.
