"İl ərzində hərbi-siyasi məsələlər üzrə çoxtərəfli və ikitərəfli xarici siyasi fəaliyyət davam etdirilib". Bu, Xarici İşlər Nazirliyinin 2024-cü ilin yekunlarına dair mətbuat buraxılışında əksini tapıb.
Məlumatda bildirilib ki, Azərbaycan-NATO tərəfdaşlığı öz əhəmiyyətini saxlayaraq, tərəflər arasında siyasi dialoq və praktiki əməkdaşlıq davam etdirilib, qarşılıqlı səfərlər həyata keçirilib. 2024-cü il, həmçinin Azərbaycanın Sülh Naminə Tərəfdaşlıq Proqramı Çərçivə Sənədinə qoşulmasının 30-cu ildönümü ilə əlamətdar olub və silsilə tədbirlər təşkil edilib.
Politoloq Zeynal Əmrəliyev “Sherg.az”a söyləyib ki, Azərbaycan və NATO münasibətləri yüksələn xətlə inkişaf edir:
“Xüsusilə də ölkəmizin Alyansın ikinci böyük hərbi gücü olan Türkiyəylə əməkdaşlığı Azərbaycan-NATO əlaqələrində əhəmiyyətli yer tutan elementlərindən biridir. Azərbaycan Sülh naminə Tərəfdaşlıq proqramı çərçivəsində NATO-nun bir çox tədbirlərində iştirak edib. Eləcə də “Şərq Tərəşdaşlığı” çərçivəsində Azərbaycan NATO qoşunlarının yanında sülh yaratma prosesində yaxından fəaliyyət göstərib. Eyni zamanda Azərbaycan Ordusu İraq, Əfqanıstan və digər bölgələrdə sülhün yaradılması ilə bağlı öz mövqeyini sərgiləyib. Azərbaycan Ordusunun NATO standartları çərçivəsində qurulması istiqamətində son zamanlar sürətli şəkildə islahatlar həyata keçirilir. Qeyd etmək lazımdır ki, bu çərçivədə “Komondo” qoşun növünün yaradılmasını özündə ehtiva edir. Bundan sonra da Azərbaycan və NATO əməkdaşlığı davam etdiriləcək. Azərbaycan parlamentariləri NATO Parlament Assambleyasının iclaslarında fəal şəkildə iştirak edirlər və irəli sürülən məsələlərlə bağlı tərəfdaşlıq proqramı fonunda rəsmi Bakı tərəfindən mühim addımlar atılır. NATO-nun yeni baş katibi Mark Ruttenin Azərbaycanla əməkdaşlıq istiqamətində verdiyi müsbət açıqlamalar şübhəsiz ki, iki tərəf arasındakı münasibətlərin daha da genişləndirilməsinə töhvə verəcək amillərdəndir”.
