Bu ilin yanvar-sentyabr aylarında Azərbaycanın qarşılıqlı turizm xidmətlərinin dövriyyəsi ötən ilin eyni dövrü ilə müqayisədə 42,7 % artaraq 2,8 milyard ABŞ dolları təşkil edib.
Bu barədə Azərbaycan Mərkəzi Bankı xəbər verir.
Hesabat dövründə turizm xidmətləri üzrə ixracın (1,6 milyard ABŞ dolları) idxalı (1,2 milyard ABŞ dolları) üstələməsi nəticəsində 400 milyon ABŞ dolları profisit yaranıb. Bu dövrdə xaricə səfər edən Azərbaycan vətəndaşlarının sayı 18,9 % , Azərbaycana gələn xarici vətəndaşların sayı isə 29,1 % artıb.
Xarici ölkələrin Azərbaycan rezidentlərinə turizmlə bağlı göstərdiyi xidmətlərin dəyəri 1,2 milyard ABŞ dolları olub. Bunun 78,4 %-i Azərbaycan vətəndaşlarının şəxsi səfərləri ilə bağlı olub (məkik idxal üçün vəsaitlər istisna olmaqla).
9 ayda qeyri-neft sektoru üzrə qeyri-rezidentlərə göstərilən tikinti xidmətlərinin dəyəri 11,4 % azalaraq 25 milyon ABŞ dolları təşkil edib. Qeyri-neft sektoru üzrə qeyri-rezidentlərə ödənilən digər işgüzar xidmətlərin dəyəri isə 57,3 % artaraq 1,4 milyard ABŞ dolları olub.
Turizm eksperti Ceyhun Aşurov “Sherg.az”a bildirib ki, qarşılıqlı turizm xidmətləri dövriyyəsində idxal və ixrac əməliyyatları nəzərdə tutulur:
“Yəni ölkəyə gələn turistlərdən alınan gəlirlər ixrac əməliyyatı sayılır. Bu 1.6 milyard dollara yaxın olub. Ölkədən gedənlərin xərclədiyi pullar isə idxal sayılır. Ölkədən apardıqları valyuta isə 1.2 milyard dollardır. Ümumi olaraq profisit 400 milyon dollar qiymətləndirir. Yəni ölkənin turizmdən, qazandığı pul xərclədiyindən daha çox olub və bu da müsbətdir. Çünki 2019-cu ildə Azərbaycandan xarici səfərlərə gedən vətəndaş sayı 5.5 milyon təşkil edib. Ölkəyə gələnlərin sayı isə təxminən 3.2 milyondur. Bizdə hər zaman getmə turizmi gəlmədən daha çoxdur. Pandemiyadan sonra yaranmış vəziyyətlə əlaqədar olaraq ölkədən getmə bazarı daha zəif bərpa olunur, nəinki ölkəyə gəlmə. Hazırda xaricdən ölkəyə təxminən iki milyona yaxın gələnlər varsa, bir o qədər də gedənlər var. Ümumiyyətlə 5.5 milyonun qarşılığında 2 milyona yaxın getmə turizmi çox azdır. Bizdə bu da profisitin yaranmasına səbəb olub. Azərbaycana xaricdən gələn vətəndaşlar, əlbəttə, qonşu ölkələrdəndir. Rusiya, Türkiyə, İran, İsrail, hətta son dövrlər Hindistan, Pakistan, Orta Asiya ölkələri, Körfəz ölkələrinin sayında artımları görürük. Lakin gedilən ölkələrdə də ən çox məhz bu ölkələr üstünlük təşkil edir”.
