Bu ilin yanvar-noyabr aylarında Azərbaycandan Avropaya 11,7 milyard kubmetr qaz ixrac olunub.
“Report” xəbər verir ki, bunu energetika naziri Pərviz Şahbazov “X” sosial şəbəkəsindəki hesabında bildirib.
Məlumata görə, bu dövr ərzində Türkiyəyə 9 milyard kubmetr, Gürcüstana isə 2,2 milyard kubmetr qaz ixrac olunub.
Bundan başqa, onun sözlərinə görə, bu dövr ərzində Trans-Anadolu Qaz Boru Kəməri (TANAP) ilə Türkiyəyə 5,1 milyard kubmetr qaz nəql edilib.
Bu ilin 11 ayı ərzində xaricə qaz satışı ötən ilin müvafiq dövrü ilə müqayisədə təqribən 5 % çoxdur.
Xatırladaq ki, Azərbaycan qazının Avropaya tədarükü Cənub Qaz Dəhlizinin tərkib hissəsi olan Trans-Adriatik Boru Kəməri (TAP) vasitəsilə 2020-ci ilin sonunda başlayıb. Hazırda kəmərin ötürücülük qabiliyyəti ildə 12 milyard kubmetr qaz təşkil edir və 2027-ci ilin sonunadək 20 milyard kubmetrə çatdırılması nəzərdə tutulub.
TAP-ın ümumi uzunluğu 878 km-dir ki, bunun da 550 km-i Yunanıstanın şimal hissəsindən, 215 km-i Albaniya ərazisindən, 105 km-i Adriatik dənizinin dibi ilə, 8 km-i isə İtaliya ərazisindən keçir.
Bolqarıstana “mavi yanacağın” nəqli TAP-a birləşdirilən Yunanıstan-Bolqarıstan İnterkonnektoru (IGB) ilə həyata keçirilir. “Bulgargaz EAD” dövlət şirkəti “Şahdəniz-2” yatağından 1 milyard kubmetr qazın tədarükü üçün “Şahdəniz” konsorsiumu ilə müqavilə imzalayıb.
Ümumi uzunluğu 182 kilometr olan boru kəmərinin 150 kilometrlik hissəsi Bolqarıstan ərazisindən keçir. Boru kəmərin illik ötürücülük qabiliyyətinin 3-5 milyard kubmetr olacağı gözlənilir.
Neft sahəsi üzrə tanınmış ekspert, Neft Araşdırmaları Mərkəzinin rəhbəri İlham Şaban “Sherg.az”a bildirib ki, hökumətin cari il üçün yenilənmiş proqnozuna görə, Azərbaycan Avropa bazarında 12.5 milyard kubmetr qaz satmalıdır:
“Azərbaycanın 11 ayın yekunları üzrə 11.7 milyard kubmetr qaz satması onu göstərir ki, 2024-cü ildə hər şey plana uyğun gedir. Həmçinin ötən illə müqayisədə Azərbaycan cari ildə məhz Avropa bazarında qaz satışını təqribən milyard kubmetr artırmaq imkanına malik olacaq. Bu da onun göstəricisidir ki, Azərbaycan 2022-ci ildə Avropa Komissiyası ilə imzaladığı enerji sahəsində əməkdaşlığa dair memoranduma sadiqdir. Yəni Bakı üzərinə düşən vəzifələri artıqlaması ilə həyata keçirir. Eyni zamanda Azərbaycan Avropanın enerji təhlükəsizliyində kifayət qədər özünün imkanları daxilində töhfəsini verə bilir”.
