Azərbaycanda çörəyin qiymətində ucuzlaşma müşahidə edilib. Bir neçə gündür ki, 650 qramlıq dairəvi zavod çörəyi 60 qəpiyə yox, 55 qəpiyə satılır. Bu da çörəyin qiymətinin daha 5 qəpik ucuzlaşması deməkdir. Ucuzlaşma daha çox iri market şəbəkələrində qeydə alınıb. Kiçik mağazalarda isə hələlik ucuzlaşma hiss olunmur.
Qeyd edək ki, zavod çörəyi bir il əvvələ qədər pərakəndə satış mərkəzlərində 70 qəpiyə satılırdı. İl ərzində isə qiymətlərdə 3 dəfə ucuzlaşma müşahidə edilib. Əvvəlcə 65, daha sonra isə 60 qəpiyə enmişdi.
Taxılın dünya bazarındakı qiymətində cüzi ucuzlaşma müşahidə olunduğunu xatırladan iqtisadçı-ekspert Xalid Kərimli isə “Sherg.az"a açıqlamasında deyib ki, Azərbaycanda taxılın qiyməti dünya bazarından asılı olduğu üçün dünya bazarında taxılın ucuzlaşması daxili bazara da birbaşa təsir edir.
Ekspert qeyd edib ki, dünyada bol məhsuldarlıq var, Qazaxıstanda, Rusiyada, Amerikadakı yüksək məhsuldarlıq dünyada taxıl bolluğu yaradıb ki, bu da təbii olaraq qiymətlərin aşağı düşməsi ilə nəticələnib:
“Bu da unun qiymətinə, un məhsullarının, o cümlədən də çörəyin qiymətinə təsir göstərir və cüzi ucuzlaşma müşahidə olunur. Proses hələlik davam edir deyə, Azərbaycanın un və çörək bazarında mütəmadi qiymət ucuzlaşmalarını müşahidə edirik.
Lakin Rusiya-Ukrayna müharibəsi səbəbindən Ukrayna taxılının dünya bazarına çıxarıla bilməməsi sonrakı aylarda taxılın qiymətindəki ucuzlaşmanı məhdudlaşdıracaq”.
