“Bu, çətin olsa da, fermerlər məhsulları ən yüksək səviyyədə istehsal etməyi bacarmalıdırlar”
“Belə olsa, hansısa ölkə sanksiya tətbiq edəndə, asanlıqla alternativ bazar tapmaq olar”
“Aqrar istehsala ənənəvi deyil, elmi yanaşmaq lazımdır”
Rusiya Azərbaycanın daha 4 müəssisəsindən pomidor idxalına icazə verib. Bu ölkənin Baytarlıq və Fitosanitar Nəzarəti üzrə Federal Xidməti (“Rosselxoznadzor”) dekabrın 17-dən Azərbaycanın daha 4 müəssisəsindən pomidor idxalına icazə verib. Yeniavaz.com Trend-ə istinadən xəbər verir ki, xidmətin məlumatına görə, Kürdəmir rayonunun “Geotermal”, Salyan rayonunun “Gp Alfa greenhouse” və Masallı rayonunun müəssisələrindən, eləcə də Hacıqabul rayonunun “Hajigabul greenhaouse” MMC-dən Azərbaycan Qida Təhlükəsizliyi Agentliyinin təminatı ilə pomidor idxalına yenidən başlanacaq.
Xatırladaq ki, “Rosselxoznadzor” dekabrın 16-dan Xızı rayonunda yerləşən “Aqroterm” MMC-dən pomidor idxalına icazə verib.
Qeyd edək ki, “Pomidor müharibəsi” artıq bir müddətdir ki, davam edir.
İqtisadçı-ekspert Rəşad Həsənov son vəziyyəti “Sherg.az”a təhlil edərkən onun nəticələrindən danışıb:
“ Bu, qısamüddətli dövrdə fermerlər üçün gözlənilən 5-6 milyon dollar zərərin müəyyən mənada qarşısının alınması deməkdir. Düzdür, idxal üçün bütün şirkətlərə icazə verilməyib. Lakin təkcə bir şirkət də daxili bazarda vəziyyətin tənzimlənməsinə və qiymətlərin fermerə mənfi təsir göstərməyəcəyi həddə çatmamasına nail ola bilər. Başqa sözlə desək, beləliklə, fermerə dəyən ziyan zəifləyəcək. Əlbəttə, bu, icazə verilən şirkətin bazar payı ilə düz mütənasibdir. Yəni icazə verilən şirkətin bazarı payı nə qədər çox olarsa, potensial zərərin həcmi o qədər azalacaq”.
R.Həsənovun fikrincə, fermerlər bu cür fors-major hadisələrə hazırlıqlı olmalıdırlar:
“Baş vermiş və verə biləcək problemlər nəzərə alınaraq fermerlər öz istehsallarına düzəliş etməli, məsələyə strateji yanaşmalıdırlar. Bazarların və istehsalın şaxələndirilməsindən ötrü planlar hazırlanmalıdır. Təssüf ki, fermerlərin çoxu bir məhsul üzrə ixtisaslaşıblar. Belə olan halda bu və ya digər səbəbdən qəfildən bazarda vəziyyət dəyişəndə fermer pis vəziyyətdə qalır. Həmçinin məhsul hansısa münasibətlərə görə yox, keyfiyyətin, beynəlxalq standartlara cavab verməsinə görə bazara çıxarılmalıdır. Bu, çətin olsa da, fermerlər məhsulları ən yüksək səviyyədə istehsal etməyi bacarmalıdırlar. Belə olsa, hansısa ölkə sanksiya tətbiq edəndə, asanlıqla alternativ bazar tapmaq olar.
Deməyim odur ki, fermerlər geniş düşünməli, rəqabətədavamlı məhsul istehsal etməlidirlər. Ümumiyyətlə, aqrar istehsala ənənəvi deyil, elmi yanaşmaq lazımdır”.
