Azərbaycan Mətbuat Şurası beynəlxalq ictimaiyyətə müraciət edib.
Müraciətdə deyilir:
"Son illərdə Rusiya Federasiyası mediadan xarici siyasətə təsir aləti kimi getdikcə daha çox istifadə edir. İnformasiya fəaliyyəti adı altında ictimai rəyin formalaşdırılmasına, suveren dövlətlərdə siyasi vəziyyətin sabitliyinin pozulmasına yönəlmiş genişmiqyaslı kampaniyalar həyata keçirilir. Bu cür hərəkətlər başqa ölkələrin daxili işlərinə müdaxilə olmaqla yerli ictimai qurumların fəaliyyətinə xələl gətirir, hakimiyyətə inam səviyyəsini azaldır. Bu təcrübə xüsusilə Rusiyanın Sputnik agentliyinin və onun əməkdaşlarının fəaliyyətində özünü büruzə verir.
Rusiya Jurnalistlər İttifaqının Sputnik Azərbaycan agentliyinin əməkdaşlarının həbsi ilə əlaqədar beynəlxalq təşkilatlara, jurnalist və insan haqları birliklərinə ünvanlanmış açıq məktubuna cavab olaraq, hadisələrin obyektiv mənzərəsini beynəlxalq ictimaiyyətə təqdim etməyi zəruri hesab edirik.
Əvvəla, məktubda faktlar kobud şəkildə təhrif olunur ki, bu da beynəlxalq ictimai rəyi manipulyasiya etmək cəhdindən açıq şəkildə xəbər verir. Sputnik Azərbaycan-ın rəhbəri İqor Kartavıx və baş redaktor Yevgeni Belousovun saxlanılması açıq məktubda yer alan ifadələrin əksinə olaraq, onların jurnalistika sahəsində peşə vəzifələrini yerinə yetirmələri ilə heç bir əlaqəsi yoxdur. Xüsusilə vurğulanmalıdır ki, həmin şəxslər Rusiya Federasiyasının Federal Təhlükəsizlik Xidməti (FTX) ilə əməkdaşlıq ediblər və jurnalist fəaliyyəti ilə bağlı olmayan tapşırıqları yerinə yetirmək məqsədilə Azərbaycanda olublar. Bu baxımdan onların saxlanılması mövcud qanunvericiliyə tam uyğun və qanun çərçivəsində həyata keçirilən hüquqi tədbirdir.
Beynəlxalq insan haqları təşkilatlarının hesabatlarında mütəmadi olaraq Rusiyada müstəqil jurnalistikanın geniş miqyaslı azalması qeyd edilir və ekspertlər təxminən 60-70% rəqəmlərə istinad edirlər. Oxşar nəticələrə mötəbər mənbələrin materiallarında da istinad edilir ki, bu da ölkədə söz azadlığının boğulması istiqamətində sistemli və köklü tendensiyanın olduğunu göstərir.
Belə ki, Yuri Şçekoçixin, Anna Politkovskaya, Pavel Şeremet, Pol Klebnikov və bir çox başqaları kimi tanınmış jurnalistlərin səs-küylü qətli ilə bağlı işlərin üstü hələ də siyasi motivlərə görə açılmamış qalır. Rusiyanın Ukraynaya qarşı hərbi kampaniyası başlayandan media üzərində senzura xeyli artıb, istənilən alternativ mövqe fəal şəkildə yatırılır, öz mövqeyini bildirməyə çalışan jurnalistlər təqib olunur və həbs edilir.
Yuxarıda deyilənlərə baxmayaraq, Rusiya Jurnalistlər Birliyi öz ölkəsində real risk altında olan müstəqil jurnalistləri müdafiə etməkdə eyni inadkarlıq nümayiş etdirmədən, şübhəli casusları dəstəkləməyə üstünlük verir.
Rusiya Federal Təhlükəsizlik Xidmətinin şöbəsindən başqa bir şey olmayan "Sputnik Azərbaycan” agentliyinin əməkdaşlarının saxlanması ilə bağlı yaranmış vəziyyətdə beynəlxalq jurnalist və insan haqları təşkilatları ilk növbədə Rusiya Jurnalistlər İttifaqının təmsil etdiyi guya müstəqil jurnalist təşkilatlarının xüsusi xidmət orqanları ilə əlaqəsi, onları siyasi təsir və informasiya manipulyasiyası vasitəsinə çevirmək barədə düşünməlidir.
Biz beynəlxalq jurnalist və insan haqları təşkilatlarını bu cür informasiya təxribatına adekvat reaksiya verməyə və mediadan siyasi məqsədlər üçün istifadəni qətiyyətlə pisləməyə çağırırıq".
