İspaniya və Ukrayna martın 14-də ukraynalı hərbçilərin hazırlanmasına dair saziş imzalayıblar.
“Report” Ukrayna KİV-ə istinadən xəbər verir ki, bu barədə Ukraynanın müdafiə naziri Rustem Umerov ispaniyalı həmkarı Marqarita Robleslə görüşündən sonra sosial şəbəkələrdə məlumat verib.
“Birgə təhlükəsizliyin əsas məsələlərini və Ukrayna Müdafiə Qüvvələrinin daha da gücləndirilməsini müzakirə etdik. Əməkdaşlığın xüsusi diqqət tələb edən prioritet istiqamətlərini müəyyən etdik. Digər məsələlərlə yanaşı, sənaye əməkdaşlığının dərinləşdirilməsi, hava hücumundan müdafiə sistemlərinin gücləndirilməsi, döyüş sursatı və zirehli texnikanın tədarükünə diqqət yetirdik”, - Umerov bildirib.
Onun sözlərinə görə, Robles 2025-ci ildə Ukraynaya yardımla bağlı ətraflı planları təqdim edib, eyni zamanda İspaniya tərəfi də Ukraynanın müasir müharibənin aparılması təcrübəsinin öyrənilməsinə ciddi maraq göstərib.
“Danışıqların yekununda Ukrayna hərbçilərinin hazırlanmasına dair saziş imzalanıb”, - Umerov söyləyib.
