Dubayın simvolu olan "Burc Xəlifə" dünyanın ən hündür binası titulunu itirmək üzrədir. Səudiyyə Ərəbistanı və BƏƏ-nin yeni göydələn layihələri bu yarışda sərhədləri yenidən müəyyənləşdirir.
Sherg.az xəbər verir ki, 2010-cu ildən bəri Dubayın simvoluna çevrilmiş 828 metr hündürlüyündəki Burc Xəlifə taxtını təhvil verməyə hazırlaşır. Onu geridə qoymağa namizəd yalnız Birləşmiş Ərəb Əmirliklərinin yeni layihələri deyil, qonşu və regional rəqib Səudiyyə Ərəbistanı da iki nəhəng qüllə ilə yarışa qoşulub.
Səudiyyə Ərəbistanı və BƏƏ qlobal memarlıqda səs-küy yaradacaq layihələrlə həm nüfuz, həm də diqqət qazanmaq istəyir. Məqsəd - neft iqtisadiyyatından uzaqlaşmaq, beynəlxalq sərmayələri cəlb etmək, turizmi artırmaq və regionu innovasiya mərkəzi kimi möhkəmləndirməkdir.
Rise Tower (Riyad): Səudiyyə Ərəbistanının Dövlət İnvestisiya Fondu (PIF) tərəfindən inşa ediləcək və 5 milyard dollara başa gələcək bu qüllə 2 kilometr hündürlüyə çatacaq. Beləliklə, həm "Burc Xəlifə"ni, həm də tikintisi davam edən "Ciddə" qülləsini geridə qoyacaq.
"Ciddə" qülləsi (Burj Jeddah): Hündürlüyünün 1000 metrdən artıq olması gözlənilir və tikinti sürətlənib.
Burj Azizi (Dubai): 725 metr hündürlüyündə nəzərdə tutulan bu qüllə "Burc Xəlifə"dən alçaq olacaq. Lakin Gulf News layihənin təxminən 1000 metrə qədər yüksələ biləcəyini iddia edir.
Regiondakı göydələn layihələri arasında iki "Tramp Tower" də var - biri Ciddədə, digəri Dubayda.
Səudiyyə Ərəbistanındakı layihələr dövlət dəstəyi ilə həyata keçirilən meqa-investisiyalar kimi önə çıxırsa, Dubaydakı göydələnlər əsasən özəl sektor təşəbbüslərinə əsaslanır.
Rəqabət yalnız hündürlük üzərində deyil. Ağıllı şəhərlər, süni intellekt əsaslı infrastruktur və qabaqcıl şəhərsalma layihələri də bu yarışın mühüm istiqamətlərindəndir. Bu təşəbbüslər Körfəzin “gələcəyin texnoloji mərkəzlərindən biri” olma iddiasını gücləndirir.
