“Dünyaya Şuşanın həmişə bizə məxsusluğunu nümayiş etdirəcəyik"
Dünya Azərbaycanlılarının V Qurultayının keçirilməsi ilə bağlı hazırlıq işləri yekunlaşmaq üzrədir.
Qurultayın Ali Baş Komandan İlham Əliyevin rəhbərliyi ilə qüdrətli ordumuzun düşmən işğalından azad etdiyi, Azərbaycanın mədəniyyət paytaxtı Şuşa şəhərində keçirilməsi nəzərdə tutulur.
Qurultay iştirakçıları əvvəlcə Bakı şəhərində Fəxri Xiyabanı, I və II Şəhidlər Xiyabanını ziyarət edəcək, daha sonra Şuşa şəhərinə yola düşəcəklər.
Tədbirdə 65 ölkədən 400 nəfərə yaxın diaspor nümayəndəsinin iştirakı gözlənilir. Qurultayın rəsmi açılış mərasimindən sonra Diasporla İş üzrə Dövlət Komitəsinin fəaliyyətinə dair hesabat verilməsi, “Post-müharibə dövründə Azərbaycan diasporunun qarşısında duran vəzifələr”, “Qarabağın bərpası və yenidən qurulmasına Azərbaycan diasporunun töhfələri” mövzularında müzakirələrin təşkili planlaşdırılır.
Qeyd edək ki, Dünya Azərbaycanlılarının V Qurultayı son illər yüksək təşkilatlanma və birlik nümayiş etdirən, beynəlxalq ictimaiyyətin Azərbaycan həqiqətləri ilə bağlı məlumatlandırılmasında xüsusi rol oynayan diasporumuzun Qarabağın azad olunmasından sonra ilk böyük görüşü baş tutacaq.
Qurultayla bağlı gözləntilərini "Sherg.az"la bölüşən millət vəkili Aqil Abbas bildirib ki, tədbirin Şuşada gerçəkləşdirilməsi Qarabağın incisinə verilən dəyərdən irəli gəlir:
“Bu il Şuşa ilidir. 2023-cü ildə Türk Dünaysının Mədəniyyət Paytaxtı elan olunub. Şuşa yarandığı gündən mədəniyyət mərkəzidir.
Dünya azərbaycanlıları orda toplaşacaq. Doğma torpağımızda ucalan bayrağımızı görəcəklər. Prezindentin Şuşaya göstərdiyi diqqətin şahidi olacaqlar. Yaxın günlərdə yenə də Şuşaya getmişdim.
Tikinti quruculuq işləri sürətlə gedir. Dünyaya Şuşanın həmişə bizə məxsusluğunu nümayiş etdirəcəyik".
