Azərbaycan geostrateji mövqeyinin fərqindədir və Qərbin Rusiyadan uzaqlaşmaq istədiyi bir dövrdə öz rolunu daha da gücləndirmək niyyətindədir.
Teleqraf xəbər verir ki, bu barədə Azərbaycan Prezidentinin xüsusi tapşırıqlar üzrə nümayəndəsi Elçin Əmirbəyov İspaniyaya səfəri zamanı EFE agentliyinə açıqlamasında bildirib.
O, Avropa İttifaqına (Aİ) mühüm mesaj ünvanlayıb: “Əgər Aİ Mərkəzi Asiyaya yaxınlaşmaqda həqiqətən maraqlıdırsa, o zaman Cənubi Qafqazda öz mövcudluğunu artırmalıdır”.
E. Əmirbəyov xatırladıb ki, Asiya ilə Avropa arasında əsas nəqliyyat və enerji bağlantıları, neft və qaz kəmərləri, dəmir yolları Mərkəzi Asiyadan keçərək Azərbaycan, Gürcüstan və Türkiyə üzərindən Qərb bazarlarına çatır. Bu Mərkəzi Dəhliz Şərqi Asiya ilə Qərbi Avropa arasında ən qısa, sərfəli və davamlı bağlantı hesab olunur.
Rusiyanın Ukraynaya qarşı müharibəsindən sonra Azərbaycan Aİ üçün daha vacib tərəfdaşa çevrilib. Prezidentin xüsusi nümayəndəsinin sözlərinə görə, 2022-ci ildən bəri Asiya ilə Avropa arasında ticarət dövriyyəsi 75% artıb və bu dinamika davam edəcək.
“Hazırda biz Aİ ilə infrastrukturun tutumunun artırılması məsələsini müzakirə edirik. Çünki artan tələbat Avropa tərəfindən ciddi investisiyalar tələb edir. Azərbaycan qazına yalnız Avropa yox, dünyanın digər bölgələrindən də tələbat var,” – deyə Əmirbəyov vurğulayıb.
Onun sözlərinə görə, bu məsələlərin müzakirəsi üçün İspaniyaya səfər etməsi də təsadüfi deyil çünki Madridin Brüsseldəki nüfuzu bu danışıqlarda mühüm rol oynayır.
