Asəf Quliyev: "“3+3” formatı hələlik yalnız Rusiya və İrana sərf edir"
Rusiya "3+3" formatında iştirak edir və təbii ki, belə bir şəraitdə biz Rusiya ilə heç bir masa arxasında oturmaq fikrində deyilik. Bunu Gürcüstanın hakim “Gürcü Arzusu” partiyasından olan deputat Levan Maçavariani Rusiya XİN başçısı Sergey Lavrovun sözlərinə münasibət bildirərkən deyib. Deputat Gürcüstanın iştirakının müzakirə məsələsi olmadığını vurğulayıb.
Maçavariani bildirib ki, bizim nə diplomatik, nə də başqa cür münasibətlərimiz yoxdur. Əvvəlcə biz ərazi bütövlüyümüz məsələsini həll etməliyik, bundan sonra hər hansı formatın olub-olmayacağını müzakirə etməyə başlaya bilərik.
Araşdırmaçı-jurnalist Asəf Quliyev “Sherg.az”a söyləyib ki, Gürcüstan onsuz da əvvəldən “3+3” formatında iştirak etməyib:
“Bunun isə ciddi səbəbləri mövcuddur. Birincisi Gürcüstanın ərazisinin bir hissəsi Rusiya tərəfindən işğal olunub. Belə bir vəziyyətdə Gürcüstanın Rusiya ilə hansısa masa arxasında oturmaması məntiqlidir. Amma hər zaman sözügedən format “3+3” şəklində təqdim olunub. Görünən odur ki, “3+3” formatı hələlik yalnız Rusiya və İrana sərf edir. Çünki Amerika və Avropa kimi xarici güc mərkəzlərinin regiona girməməsi üçün Moskva və Tehran həmin məsələdə maraqlıdır”.
Ekspert bildirib ki, bu formatı təklif edən Türkiyə və Azərbaycan tandemi idi:
“Türkiyə ilə Azərbaycanın da öz maraqları və prioritetləri vardı. Həmin prioritetlər baxımından “3+3” formatı uğurlu hesab edilə bilərdi. Lakin Gürcüstan hələki sözügedən formatda iştirak etmək istəmir. Rusiya və Azərbaycan arasındakı soyuqluğu nəzərə aldıqda “3+3” formatında hansısa addımların atılması real görünmür. İki ölkə arasında sular durulduqdan sonra bu formatı yenidən işlək vəziyyətə gətirmək olar. Digər tərəfdən Türkiyə də hazırda “3+3” formatına həvəs göstərmir. Çünki Türkiyənin Suriya və Ukrayna kimi prioritetləri mövcuddur. Avropada, Səudiyyə Ərəbistanı və Ankarada keçirilən son görüşlər Türkiyə və Rusiya arasında müəyyən fikir ayrılıqlarının olduğunu ortaya qoyur”.
