“Suriyanın yeni hakimiyyəti heç bir xarici qüvvənin və ya ölkə içindəki qruplaşmaların ölkəni vətəndaş müharibəsinə sürükləməsinə imkan verməyəcək.”
Bunu Suriyanın prezidenti Əhməd əl-Şara ölkənin qərbində baş verən hadisələrə münasibət bildirərkən deyib.
O bildirib ki, bu gün biz yeni təhlükə ilə üz-üzəyik.
"Bu, əvvəlki rejimin qalıqları və onların arxasında duran xarici qüvvələrin ölkəmizi parçalamaq, birliyini və sabitliyini pozmaq məqsədi ilə yeni nifaq salmaq, ölkəmizi vətəndaş müharibəsinə sürükləmək cəhdidir".
Qeyd edək ki, martın 6-da Laziqiyyə, Tartus və Homs vilayətlərində hökumət qüvvələri ilə devrilmiş prezident Bəşər Əsədin tərəfdarları arasında toqquşma yaşanıb.
Siyasi Tədqiqatlar Mərkəzinin sektor müdiri, politoloq İlyas Hüseynov “Sherg.az”a bildirib ki, uzun illər ərzində Suriyada davam edən vətəndaş müharibəsi müxalif qüvvələrin qələbəsi ilə yekunlaşdı:
“Nəticə etibarilə Bəşər Əsəd ölkədən qaçmaq məcburiyyətində qaldı. Hazırda Suriyada mövcud olan sabit duruma isə dünyanın bir çox ölkələri dəstək vermək niyyətindədirlər. Türkiyə və bir sıra dövlətlər Suriyada sabitliyə, təhlükəsizliyə və sülh yönündə dayanıqlı duruma dəstək verməyə çalışırlar. O cümlədən bəzi qüvvələr tərəfindən də hazırki vəziyyətə qarşı müqavimət göstərmək və Suriyanı yenidən ziddiyətlər dövrünə geri qaytarmaq yönündə də müəyyən addımlar atılır. Bir neçə gün öncə Tartus, Latakiya və Homs vilayətində devrilmiş qüvvələr ilə hökümət arasında toqquşma baş verib. Qardaş Türkiyənin regionda nüfuz qazanmasına qarşı çirkin əməllər davam etdirilir. Lakin bütün bunlara baxmayaraq yeni formalaşan Əhməd əl-Şaraa höküməti və Türkiyənin siyasi dəstəyiylə Suriyanın ərazi bütövlüyü və təhlükəsizliyi təmin olunacaq. Suriya hazırda çox çətin bir dövrdən keçir. İsrailin Suriya ərazilərində daha böyük coğrafiyanı əhatə etməsi və ölkənin Şimal Şərqində yaranan separatçı vəziyyətlə bağlı yeni hökümət qalib gəlsə, uzun müddət bölgədə təhlükəsizlik yarana bilər”.
