ABŞ-nin yeni administrasiyası bütün dünya üçün yeni eranı başlada bilər
"ABŞ Prezidenti Donald Trampın yanvar ayında baş tutan andiçmə mərasimində qlobal miqyasda fəaliyyət göstərən bir neçə texnologiya nəhəngi rəhbərlik səviyyəsində təmsil olundu. Bu iştirak həm yeni prezidentə dəstək, həm də yeni yaranmış konyekturada mövqe tutma ilə bağlı vacib məqam kimi qiymətləndirilə bilər".
Bu barədə siyasi şərhçi Elvin Baxşalızadə "Sherg.az"a deyib. Ekspert bildirib ki, andiçməyə dəvətlilər sırasında "Tesla" və "Space X"-in əsas sahibi İlon Mask, "Meta"nın "Ceo"su Mark Zukerberq, "Amazon"un əsas qurucusu Ceff Bezos, "Apple", "Tiktok" və "Open AI"-nin baş icraçı direktorları var idi:
"Bəzi iddialara görə, ABŞ daxilindəki hazırkı bürokratik qaydalar texnoloji qiqantların qarşısında bir çox maneələr yaradır. Bu baxımdan onların "sistemdənkənar prezident" Trampa yaxınlaşması və əməkdaşlığı məntiqə uyğundur. Böyük ehtimal texnoloji qiqantlar bir çox bürokratik qaydaların onların xeyrinə dəyişdirilməsi müqabilində ABŞ-yə nəhəng investisiyalar yatırmaq öhdəliyi götürüblər. Artıq bu razılaşmanın ilkin işartıları görünməkdədir. Belə ki,"Apple" korporasiyası yaxın 4 il ərzində ABŞ iqtisadiyyatına 500 milyard dollar həcmində investisiya qoyacağı ilə bağlı böyük öhdəlik götürüb. Bu investisiya süni intellekt başda olmaqla bir çox texnoloji sferanı əhatə edəcək. Bu çərçivədə ABŞ-də 20 mindən çox yeni iş yerinin yaradılacağı bildirilir. Bundan başqa, Tramp seçki dönəmində ona ən ciddi dəstək verən iş adamlarından biri İlon Maskı da unutmadı. Artıq İlon ABŞ dövlət aparatında ən mühüm vəzifələrdən birinə təyinat alıb. O, Hökumət Səmərəliliyi Departamentinə rəhbərlik edir. Burada İlon Maskın əsas hədəfi müxtəlif dövlət strukturlarında xərclərin effektiv xərclənməsinə nəzarət etmək, israfçılığın qarşısını almaq və bu yöndə yoxlanışlar həyata keçirməkdir. Ümumən isə ABŞ-nin yeni administrasiyası və texnoloji qiqantların yaxın əməkdaşlığı qlobal miqyasda bütün dünya üçün yeni eranı başlada bilər. Ola bilsin ki, bu əməkdaşlıq dünyanı tamamilə fərqli yönə istiqamətləndirəcək və burada əsas lokomotiv rolunda məhz texnologiya nəhəngləri çıxış edəcək".
