Yaponiyanın Yerləşmə İnformasiya İdarəsi UNESCO-nin dünya irs siyahısında olan Fuci dağının hündürlüyünü yenidən ölçüb.
AZƏRTAC Yaponiya mediasına istinadla xəbər verir ki, yeni ölçmə zamanı ölkənin ən hündür zirvəsi olan Fucinin əvvəlki ölçmədən daha 5 santimetr uca olduğu (3775,56 metr) müəyyənləşib. Qurum ötən ilin iyulunda ölkə ərazisində yüksəkliklərin yer qabığının deformasiyasına görə necə dəyişdiyini qiymətləndirmək üçün araşdırma aparıb. Araşdırma zamanı ən son texnologiyalar, o cümlədən peyk məlumatları vasitəsilə zirvələrin hündürlüyü ölçülüb. Nəticədə əvvəlki ölçmələrlə müəyyən fərqlər ortaya çıxıb.
Qeyd edək ki, Fuci və ya Fuciyama ("Müqəddəs dağ") adlanan dağ “yatmış vulkandır”. Sonuncu dəfə burada vulkan 1707–1708-ci illərdə püskürüb. Paytaxt Tokiodan 90 kilometr məsafədə yerləşən Fuci dağının yapon mədəniyyətində böyük yeri var. Fuci dağı tarix boyu yazıçıların, şairlərin, rəssamların ilham mənbəyi olub. Dağın ətəklərində Şinto və Taysekici məbədləri də daxil olmaqla, 25 mədəni məkan var. 2013-cü ildə mədəni əhəmiyyəti nəzərə alınaraq UNESCO-nin Dünya İrs Siyahısına daxil edilib. Yaponların mədıni rəmzlərindən olan Fuci dağı dünyada turizm və alpinizm üçün populyar məkan hesab olunur. İldə təxminən 300 min nəfər dağın zirvəsinə dırmanır.
