Azər Badamov: Azərbaycan-İtaliya münasibətlərinin dərinləşməsi regiona inkişaf və sabitlik gətirir
Azərbaycan ilə İtaliya arasında dostluq, qarşılıqlı hörmət və etimada əsaslanan münasibətlərin dinamik və çoxşaxəli inkişafı məmnunluq doğurur. Bu fikir Prezident İlham Əliyevin İtaliya Respublikasının Prezidenti Sercio Mattarellaya ünvanladığı təbrik məktubunda yer alıb.
Dövlət başçısı vurğulayıb ki, iki ölkə iqtisadiyyat, ticarət, enerji, investisiya, müdafiə və humanitar sahələrlə yanaşı, elm və təhsil istiqamətlərində də səmərəli əməkdaşlıq həyata keçirir. İlham Əliyev Azərbaycan-İtaliya münasibətlərinin ilbəil daha da zəngin məzmun kəsb etdiyini qeyd edib.
Prezident məktubunda həmçinin bildirib ki, Azərbaycan üçün strateji tərəfdaş olan İtaliya ilə əlaqələrin bütün sahələrdə inkişafı xüsusi əhəmiyyət daşıyır. Yüksək səviyyəli siyasi dialoq və qarşılıqlı anlaşma bu münasibətlərin dərinləşməsi üçün mühüm əsas yaradır.
Milli Məclisin deputatı Azər Badamov Sherg.az-a söyləyib ki, Azərbaycan-İtaliya münasibətləri qarşılıqlı hörmət və fayda əsasında günü-gündən dərinləşməkdədir:
"İtaliya Azərbaycanın Avropa İttifaqına açılan qapısıdır. Biz İtaliya üzərindən Avropa İttifaqına üzv digər dövlətlərinə inteqrasiya oluna bilirik. Bu gün ölkələrimiz iqtisadiyyat, ticarət, energetika, sərmayə, müdafiə, humanitar, o cümlədən elm, təhsil və digər sahələr üzrə inkişaf etməkdədir. Digər tərəfdən dövlət başçıları arasında formalaşmış şəxsi dostluq münasibətləri ölkələrimiz arası münasibətlərin inkişafına yeni impuls verir. İtaliya Azərbaycanın ən iri ticarət tərəfdaşıdır. Bu ölkənin şirkətləri ölkəmizdə uğurla fəaliyyət göstərir. Həmçinin işğaldan azad olunmuş ərazilərin yenidən qurulması və bərpası prosesində də İtlaiyan şirkətləri xüsuisi töhfələr veririr. Ölkələrarası siyasi münasibətlər yüksək səviyyədədir".
Deputat qeyd edib ki, İtaliya hər zaman Azərbaycanın ərazi bütövlüyünü və haqq işini dəstəkləyir:
"Dövlət başçımızın 2 İyun-Respublika Günü münasibətilə Prezident Sercio Matteriallaya göndərdiyi təbrik məktubunda Azərbaycanla İtaliya arasında dotluq və əməkdaşlıqın dərinləşdirlməsində maraqlı olduğumuzu bildirib. Bu həm də xalqlarımızı bir-birinə yaxınlaşdırır. Ümumiyyətlə Azərbaycan-İtaliya münasibətlərinin dərinləşməsi regiona inkişaf və sabitlik gətirir desək, yanılmarıq".
