31 mindən çox yetkin insanın məlumatları əsasında aparılan geniş araşdırma ilk və son yeməyin vaxtının ömür uzunluğu və ürək-damar sağlamlığı ilə birbaşa əlaqəli ola biləcəyini ortaya qoyub.
Sherg.az xəbər verir ki, yeni araşdırma göstərib ki, sağlamlıq baxımından yalnız nə yeyildiyi deyil, qidaların günün hansı saatlarında qəbul edildiyi də əhəmiyyətli ola bilər.
Alimlər ABŞ Milli Sağlamlıq və Qidalanma Müayinəsi Araşdırması (NHANES) çərçivəsində 40 yaş və yuxarı 31 mindən çox insanın qidalanma vərdişlərini və sağlamlıq göstəricilərini təxminən 10 il ərzində izləyiblər. Yaş, siqaret istifadəsi, fiziki aktivlik, bədən kütlə indeksi və xroniki xəstəliklər kimi amillər də nəzərə alınıb.
Məlum olub ki, günün ilk yeməyinin vaxtı gecikdikcə ölüm riski artır.
İlk yeməyi gecikdirmək ürək xəstəliyi riskini artırır
Nəticələrə görə, ilk kalorili qidasını səhər saat 07:00-08:00 arasında qəbul edənlərlə müqayisədə ilk yeməyini saat 08:00-dan sonraya saxlayanlarda erkən ölüm riski daha yüksək olub. İlk yeməyin daha gec saatlara keçirilməsi ilə risk 10-19 faiz artıb, günortadan sonraya saxlanıldıqda isə bu göstərici 29 faizə çatıb.
Xüsusilə ilk yeməyini günortadan sonraya saxlayanlarda ürək-damar xəstəliklərindən ölüm riskinin 46 faiz daha yüksək olduğu müəyyənləşdirilib. Bu şəxslərin orta ömür uzunluğunun isə təxminən 2,5 il daha az olduğu bildirilib.
Son yeməyin vaxtı da əhəmiyyətlidir
Günün son yeməyinin vaxtı ilə bağlı analizdə ən aşağı ölüm riskinin axşam saat 20:00 radələrində yemək yeyənlərdə olduğu müəyyən edilib.
Son yeməyini saat 19:00-dan əvvəl yeyənlərdə risk 13 faiz, gecə yarısından sonra qida qəbul edənlərdə isə 27 faiz artıb.
Araşdırmanın rəhbəri doktor Jilei Şan bildirib ki, gec saatlarda qida qəbul etmək orqanizmin bioloji saatına və maddələr mübadiləsinə mənfi təsir göstərə bilər.
Bununla belə, mütəxəssislər araşdırmanın müşahidə xarakterli məlumatlara əsaslandığını vurğulayıblar. Onlar insanlara yalnız bu nəticələrə əsaslanaraq həkim məsləhəti olmadan qidalanma rejimində ciddi dəyişikliklər etməməyi tövsiyə ediblər.
