Seymur Verdizadə: “Xor”a qoşulanların sayının günbəgün artması məni əndişələndirir
“Deputat olmaq eşqinə düşən elə jurnalist var ki, cümlədə "da" ilə "də"nin yerini müəyyənləşdirə bilmir”
“Jurnalist həmkarlarımın seçkilərə qatılmasını normal qarşılayıram”. Bunu Sherg.az-a açıqlamasında Jurnalist Araşdırmaları Mərkəzinin rəhbəri Seymur Verdizadə deyib.
Tanınmış media nümayəndəsi bildirib ki, parlament seçkilərinə qatılmaq hər bir vətəndaşın konstitusion hüququdur:
“Bu hüququ məhdudlaşdırmaq olmaz. Amma “xor”a qoşulanların sayının günbəgün artması məni əndişələndirir. Deputat olmaq eşqinə düşən elə jurnalist var ki, cümlədə "da" ilə "də"nin yerini müəyyənləşdirə bilmir. Ya da indiyə kimi bir dəfə dilinə düz söz gəlməyib. Bütün "yaradıcılığı" yaltaqlıqdan, ona-buna yarınmaqdan ibarətdir. Belə adamların deputat seçilməsi parlamentin nüfuzunu bir az da aşağı sala bilər. Seçicilərə parlamentdə mürgü vuran deputat lazım deyil.
Milli Məclisə "yağlı" iş yeri kimi baxan adamların heç birini qapıdan içəri buraxmaq olmaz. Heç fikirləşmisinizmi ki, Azərbaycanda niyə yerindən duran adamların hamısı deputat olmaq istəyir? Xeyli düşünüb-daşınandan sonra bu sualın cavabını tapdım. İndi deputatları görəndən sonra camaat fikirləşdi ki, parlamentdə oturmaq üçün savada, dünyagörüşə, yüksək ağıla, xüsusi intellektə ehtiyac yoxdur. Ona görə də ərindən boşanan arvadlar, atasına layiq oğul ola bilməyən kişilər müğənni olmağa can atdıqları kimi, heç vaxt yaralı barmağa məlhəm olmayan adamlar da deputat olmaq eşqinə düşüblər. Sosial şəbəkələr bizə həmin adamların savadı, dünyagörüşü barədə bilgi sahibi olmaq imkanı verir”.
S.Verdizadə deputatlıq niyyətinin olub-olmaması barədə də danışıb:
“Parlament seçkilərinə qatılmaq barədə düşünmürəm. Mən jurnalistəm, bütün iddialarım mətbuatla bağlıdır. Hazırda biz jurnalistlərin qarşısında dayanan əsas vəzifə mətbuatın nüfuzunu qaldırmaqdır”.
