“Bu halda işğalçı ölkə düçar olduğu iqtisadi və siyasi çətinliklərin məngənəsindən yaxa qurtara bilər"
"Rəsmi İrəvan aqressiv siyasət yürütməkdən əl çəkməli, region dövlətləri ilə ədavətə son qoymalıdır"
"Ermənistanın müharibədə düçar olduğu acı məğlubiyyət, faciəvi nəticələr ən yüksək səviyyədə etiraf olunur".
Bunu "Sherg.az"a açıqlamasında politoloq Şəbnəm Həsənova deyib.
Analitik bildirib ki, ağır vəziyyət o dərəcədə pik səviyyədədir ki, aydın mənzərəni görən Ermənistanın rəhbər vəzifəli şəxsləri mövcud durumu etiraf etməyə məcbur qalıblar:
"44 günlük müharibə və ağır məğlubiyyət Ermənistanda köklü sosial, iqtisadi böhrana səbəb oldu. İnsanlarda gərgin mənəvi-psixoloji durum yarandı ki, bütün bunlar da nəticə etibarilə ölkədə daxili qarşıdurmanın pik həddə çatmasına səbəb oldu.
Ermənistan "güclü ordu"su olduğunu iddia etməsinə baxmayaraq, reallıqda belə bir ordu mövcud deyil. 26 il ərzində Azərbaycanda ordu quruculuğu istiqamətində real addımlar atılıb, müasir texnologiyalar tətbiq edilib. Ermənistanda isə vəziyyət iddia edildiyi kimi deyil.
Deməli, işğalçı ölkədə dövlətçiliyin dağıdılması prosesi uzun illər ərzində gedib. Bu gün isə təkcə Ermənistan dövlətçiliyinin deyil, erməni insanının imicinə də böyük zərbə vurulub. Bütün bunları etiraf edən rəhbərlər yaranmış vəziyyətdən çıxış yolunu hökumətin istefasında görürlər".
![](https://sherg.az/uploads/editor/11ccfac8127d06801047b17841d5c857.jpg)
Ermənistan rəhbərliyi hökumətlə erməni diasporu arasında divar hörüldüyünü etiraf edir:
"Erməni diasporu xalqın güzəranı və aqibəti barədə düşünmürdü. Diasporanın fəaliyyəti Ermənistan hakimiyyətinə Qərb dairələrinin diktəsi ilə siyasət yürütməsinə təsir göstərməyə fokuslanmışdı.
Əldə olunan nəticə isə göz önündədir. Ermənistanın dərin böhran içində olmasının bir göstəricisi də insanların emosional-psixoloji baxımdan çökmüş vəziyyətidir.
Minlərlə gəncin ölümü həm cəmiyyət, həm onların ailələri üçün faciədir. Koronavirusun da gətirmiş olduğu çətinliklər, həm də müharibə itkiləri səhiyyə sahəsində olan boşluqları daha da üzə çıxarıb. Demoqrafiya məsələlərində də Ermənistan uduzdu".
Ş.Həsənova bəyan edib ki, Azərbaycan təkcə döyüş meydanında və diplomatik masada deyil, eyni zamanda, informasiya və media müstəvisində də qalibdir:
"Aktiv mübarizə hələ davam edir. Ermənistanda isə qüvvələr bir-birini ittiham edir, hakimiyyət üstündə dava gedir. Ermənistan artıq aqressiv siyasət yürütməkdən əl çəkməli, region dövlətləri ilə ədavətə son qoymalıdır.
Ən əsası isə Azərbaycan və Türkiyə ilə ortaq nöqtələr tapmalıdır. Yalnız belə halda Ermənistan düçar olduğu iqtisadi və siyasi çətinliklərin məngənəsindən yaxa qurtara bilər".