Ukrayna müdafiə nazirinin istefası sıradan bir hadisə deyil
Ukraynanın müdafiə naziri Oleksiy Reznikov istefa məktubunu Ali Radaya təqdim edib.Bu barədə Reznikov "X" platformasında ("Twitter") paylaşım edib.
"Mən istefa məktubumu Ukrayna parlamentinin sədri Ruslan Stefançuka təqdim etdim. Ukrayna xalqına xidmət etmək və Ukraynanın müasir tarixinin ən çətin dövrü olan son 22 ayda Ukrayna ordusu üçün çalışmaq şərəf idi", - o, paylaşımda qeyd edib.
Məsələyə münasibət bildirən AĞ Partiya sədrinin müavini, politoloq Əhəd Məmmədli "Sherg.az"a deyib ki, Oleksiy Resnikovun istefaya göndərilməsi ilə bağlı mətbuatda məlumatlar gedirdi. Hətta Volodimir Zelenskinin orduda dəyişikliklər etməsi ilə bağlı açıqlamar da var idi:
"Amma müharibə gedən ərəfədə müdafiə nazirinin dəyişdirilməsi yaxşı şeylərdən xəbər vermir. Ola bilər ki, savaş zamanı əks-hücumun istənilən nəticə verməməsi Volodimir Zeleniski və Oleksiy Reznikov arasında fikir ayrılığına səbəb olub. Bu haqda kim necə istəyər o cür düşünər. Amma fakt odur ki, artıq Ukrayna müdafiə naziri vəzifəsində deyil. Onu tatar türkü olan Rüstəm Umerov əvəz edəcək. Yaxın zamanda Resnikovun Zelenskiyə qarşı müxalifətə keçəcəyini düşünürəm.
Artıq may ayından gedən əks-hücumlar yaxşı nəticələr verməyib. Təəssüf ki, bizim bu yöndə olan proqnozlarımız özünü doğrultdu. Ukrayna prezidentinin Amerikaya qarşı ittiham dolu açıqlamaları var. O bildirib ki, ABŞ lazımi səviyyədə dəstək olmasa, onlar da ölə bilərlər. Gələcəkdə Zelenski ciddi problemlər yaşaya bilər. Xaricdə müttəfiqləri tərəfindən ola bilsin fikir ayrılıqları da olsun.
Amma hələlik Ukrayna xalqı və dövləti bir yumruq kimi Rusiya təcavüzünə qarşı mübarizə aparır. Artıq xalq və insanlar yorularaq suallar verməyə başlayıblar. Bu gün monibilizasiya məsələsi Ukrayna gündəmindədir. Kiyev hakimiyyəti cavanların cəbhəyə getməsini xalqa necə açıqlayacaq? İstənilən halda bu gedişat Ukrayna üçün yaxşı heç nə vəd etmir".
