Azərbaycan prezidentliyinə namizədliyi qeydə alınan Zahid Oruc Sosial Tədqiqatlar Mərkəzi (STM) İdarə Heyətinin sədri vəzifəsinin icrasını dayandırıb.
Bu barədə STM-dən məlumat verilib.
Qeyd olunub ki, Mərkəzi Seçki Komissiyasının yanvarın 6-dakı qərarı ilə 2024-cü il fevralın 7-nə təyin edilən növbədənkənar Azərbaycan Respublikası Prezidenti seçkilərində namizədliyi öz təşəbbüsü ilə irəli sürülən Z.Oruc namizəd kimi qeydə alınıb.
Yanvarın 7-dən Seçki Məcəlləsinin 69.2-ci maddəsinin tələbinə uyğun olaraq, Prezident seçkilərində namizədliyi qeydə alınmış Z.Oruc STM İdarə Heyətinin sədri vəzifəsi üzrə xidməti vəzifələrinin icrası ödənişsiz məzuniyyətə göndərilməklə müvəqqəti dayandırıb.
Z.Oruc Seçki Məcəlləsinin 70.1-ci maddəsinə əsaslanaraq və Əmək Məcəlləsinin 130-cu maddəsinə uyğun olaraq qeydə alındığı gündən seçkilərin nəticələrinin rəsmi dərc edildiyi günədək ərizəsində göstərilən müddət üzrə ödənişsiz məzuniyyət götürüb.
Mövzu ilə bağlı "Sherg.az"ın suallarını cavablandıran millət vəkili, prezdentliyə namizəd Zahid Oruc bildirib ki, STM də sədr vəzifəsi bizim şəxsi qərarlarımıza görə deyil, STM nizamnəməsinə uyğun olaraq müəyyənləşir:
"İdarə heyytənin 3 üzvindən biri olan Tahirə Allahyarova Mərkəzi Seçki Qərərgahının rəhbəridir. Oda öz hesabına məzuniyyət götürəcək. Yaxında ictimaiyyətə bu haqqda da geniş məlumat veriləcək. Bunların fonunda STM-in sədr vəzifəsi hüquqi çərçivədə idarə heyyətinin 3 üzvündən biri olan millət vəkili Elşad Mirbəşirə həvalə olunur".
Z.Oruc prezident seçkilərinə hazırlıq məsələlərinə də toxunub:
"Seçki Qərərgahının mütəmadi görüşləri, tədbirləri olur. Biz bu yöndə yetərli təcrübəyə malikik. Eyni zamanda Mərkəzin bir neçə təmsilçisi bizim seçki komandamızda yer alır. Bütün siyasi işlərin, platforma və proqramın qurulması, efir çıxışları, vətəndaşlarla görüşlərlə bağlı yol xəritəsi, təqvimi hazırlanıb. Sosial Tədqiqatlar Mərkəzində çalışan əməkdaşlar ölkədəki ictimai fikirləri örgəndikləri üçün dərin təcrübəyə malikdirlər. Onlar həm medianı yaxından izləyərək, həm də mütəmadi olaraq sorğular keçirərək vətəndaşların istəklərini təhlil ediblər. Əhalini hansı qayğıların narahat etdiyini və onlara necə həll etməli olduqları barədə məlumatlıdırlar. Mərkəzi Seçki Komissiyasına imza barədə sənədlər, ilkin maliyyə hesabatlarımız, malik olduğumuz əmlak deklorasiyası təqdim olunub. Komissiya rəsmən qeydə almağı müəyyənləşdirib. Qarşıdakı bir aylıq zamanı Azərbaycan vətəndaşlarının gözləntisi doğrultusunda həyata keçirəcəyik".
