Ermənistan arasında sərhədlə bağlı gözlənilən protokolun imzalanmasının gecikməsi də məhz həmin ərazi ilə bağlıdır
Ermənistanın Gürcüstanla dövlətlərarası yolunun Tavuş vilayətinin Azərbaycanla sərhəddə yerləşən Kirants kəndindən keçən hissəsi bu gündən işləməyəcək.
Bu barədə Ermənistan KİV məlumat yayıb.
Məlumata görə, Ermənistanın yol polisləri sürücülərə Açarkut kəndindən yeni yolun tikildiyini və oradan istifadə etməli olduqlarını bildirir.
Kənddə Azərbaycanla sərhəd divarı çəkilən ərzidə qazıntı işlərinin aparıldığı deyilir. Ehtimal olunur ki, həmin ərazidə sərhədboyu tikanlı məftillər çəkiləcək.
Mövzu ilə bağlı “Sherg.az”a danışan siyasi şərhçi Asif Nərimanlı bildirib ki, sərhəddin həmin hissəsində aparılan delimitasiya işlərindən sonra qeyd olunan yerlərin və kəndin içərisində müəyyən ərazilərin Azərbaycanın nəzarətinə keçməsi gözlənilir:
“Qazax-Tavuş istiqamətində sərhədlərin delimitasiyası zamanı heç bir problem olmadı. Sadəcə müəyyən dirəniş göstərilən ərazi Kirants kəndi idi. Ermənilər sözügedən kəndlərin öz ərazilə olduğunu iddia edirlər. Halbuki həmin kəndlərin ərazisi Azərbaycanın sahələri hesabına genişləndirilib. Delimitisiya prosesi zamanı da həmin kəndlər Azərbaycana qaytarılır. Azərbaycanla Ermənistan arasında sərhədlə bağlı gözlənilən protokolun imzalanmasının gecikməsi də məhz həmin ərazi ilə bağlıdır. Azərbaycan ərazisində tikilən bəzi evlər Azərbaycana təhvil verilməli, əhali oradan çıxmalıdır. Digər tərəfdən isə sərhəd xəttinin ermənilər məskunlaşdığı ərazinin müəyyən hissəsindən keçməsi Ermənistan tərəfində qalan evlər üçün də problem yaradır. Təhlükəsizlik baxımından sərhəddə neytral zona olmalıdır. Ona görə bu problemlər aradan qalxmalıdır. Qeyd olunan kəndlərin Azərbaycana qaytarılması gözləniləndir və müəyyən razılaşma var”.
Xatırladaq ki, artıq bir neçə gündür dövlətlərarası yolun Azərbaycanın nəzarətinə keçəcəyinə dair məlumatlar yayılır. Ermənistan Sərhəd Xidmətinin bu istiqamətdə yekun işlər gördüyü bildirilir. Tavuş bölgəsindən başlayan demarkasiya prosesi nəticəsində Kirants kəndinin bir hissəsi Azərbaycanın nəzarətinə keçib. Sərhəd xətti kəndi iki hissəyə ayırıb.
