Prespektivdə Türkiyənin NATO-dan çıxması Rusiyaya qarşı gəlməsindən daha realdır
NATO ilə Rusiya arasında birbaşa toqquşma ehtimalı qorxuducudur.
Bunu Türkiyə Prezidenti Rəcəb Tayyib Ərdoğan ABŞ-nin paytaxtı Vaşinqtonda jurnalistlərə açıqlamasında deyib.
O bildirib ki, bu, təhlükəlidir: “Bu ssenarinin qarşısı alınmalıdır. Belə bir ssenariyə səbəb ola biləcək bütün addımlardan çəkinmək lazımdır”.
Rəcəb Tayyib Ərdoğanın fikirlərini “Sherg.az”a dəyərləndirən Siyasi şərhçi, "Report" İA-nın əməkdaşı Kənan Novruzov söyləyib ki, dünyada sürətlə qütbləşmə gedir:
“Bu qütbləşmənin isə Qərb və Şərq olmaqla iki tərəfi var. Hazırki situasiyada Qərbin əsas nümayəndəsi NATO-dur. Şərq dünyasının nümayəndələri isə Rusiya, Çin və İrandır. Bu gün faktiki olaraq Ukraynada Rusiya ilə NATO arasında müharibə gedir. Ukrayna isə müharibənin paliqonu seçilib. Ukraynadakı savaşın asanlıqla və yaxın vaxtda bitməsi gözlənilmir. Əksinə olaraq müharibə getdikcə böyüyür. Artıq ayrı-ayrı NATO müttəfiqləri Ukraynaya qoşun göndərməklə bağlı danışırlar. Bununla yanaşı Üçüncü Dünya Müharibəsinin olması ilə bağlı fikirlər səslənir. Əslində lll Dünya Müharibəsi başlayıb, sadəcə rəsmi şəkildə elan olunmayıb. Düşünürəm ki, qütbləşmə prosesi tam başa çatdıqdan sonra lll Dünya Müharibəsi rəsmən elan ediləcək. Həmin zaman isə Rusiya və NATO iki qütbün əsas nümayəndələri olacaqlar. Ehtimal olunan NATO və Rusiya müharibəsi mümkündür. Belə bir müharibənin olması isə Türkiyəyə sərf etmir. Çünki Türkiyə NATO ölkəsi olmasına baxmayaraq Rusiya ilə normal əlaqələrə malikdir. Bəlkə də Türkiyə yeganə NATO ölkəsidir ki, alyansın fəlsəfəsinə zidd olaraq Rusiya ilə münasibətləri qoruyur. Belə olan halda isə Türkiyə iki seçim qarşısında qalacaq. Türkiyənin asanlıqla Rusiyaya qarşı olacağını düşünmürəm. Prespektivdə Türkiyənin NATO-dan çıxması Rusiyaya qarşı gəlməsindən daha realdır. Əgər müharibə başlayarsa, Türkiyə çalışacaq ki, bitərəf mövqedə dayansın”.
