Tramp, öz siyasətini dünyanın güclü ölkələri ilə qurur
Donald Trampın birinci prezidentliyi dövründə ABŞ-Azərbaycan münasibətləri çox mühüm və qarşılıqlı faydalı əməkdaşlıq əsasında quruldu. Həmin dövrdə bir çox strateji layihələr həyata keçirildi və bu əlaqələr gücləndirildi. Lakin, 2021-ci ildən sonra Co Baydenin administrasiyasının hakimiyyətə gəlməsi ilə vəziyyət dəyişdi. Onun ermənipərəst siyasət yürütməsi, ABŞ-nin Ermənistanla Strateji Müttəfiqlik Xartiyası imzalaması və Azərbaycanın reallıqlarını düzgün qiymətləndirməməsi, münasibətlərin gərginləşməsinə səbəb oldu.
Bugünkü gündə Azərbaycan, həm iqtisadiyyat, həm də enerji resursları sahəsində dünyada önəmli bir aktora çevrilib. Bununla yanaşı, ABŞ ilə münasibətlərin normallaşdırılması və inkişaf etdirilməsi məqsədilə atılan addımlar, ölkələrimiz arasında daha dərin və geniş əməkdaşlıq imkanları yaradır.
Mövzu ilə bağlı politoloq Elşad Həsənov Sherg.az-a açıqlama verib:
"Trampın əvvəlki prezidentlik dövründə Azərbaycanla münasibətlər yaxşı olub, ABŞ ilə Azərbaycan arasında mühüm layihələr həyata keçirilib. Lakin Bayden hakimiyyətə gəldikdən sonra vəziyyət dəyişdi. Onlar Azərbaycanın reallıqlarını qəbul etmədilər, ermənipərəst siyasət yürütməyə çalışdılar, Ermənistana dəstək vermək istədilər və hərbi təlimlər keçirdilər. Nəticədə, bu ilin yanvarın 14-də Bayden administrasiyası ilə ABŞ-Ermənistan arasında Strateji Müttəfiqlik Xartiyası imzalandı. Lakin Tramp hakimiyyəti dövründə bu xartiya dondurulmuş vəziyyətdə qalmışdı.
Bu gün isə Tramp, öz siyasətini dünyanın güclü ölkələri ilə qurur. Hesab edirəm ki, Cənubi Qafqazın aparıcı ölkəsi, güclü dövləti, həm əhalisinin sayı, həm iqtisadiyyatı, həm də hərbi gücü ilə fərqlənən Azərbaycandır. Son illərdə Azərbaycanın əldə etdiyi inkişaf göz qabağındadır və biz 3 ildən artıq Qoşulmama Hərəkatının sədri kimi çox böyük uğurlar əldə etdik. Bu, dünya mətbuatında geniş şəkildə yayıldı. Azərbaycan, Afrika ölkələrinə pandemiya dövründə çoxlu yardım göstərdi və bu, ölkəmizin beynəlxalq imicinin möhkəmlənməsinə səbəb oldu".
Ekspert bu gün Azərbaycanın həm iqtisadiyyat, həm siyasət, həm də enerji resursları baxımından dünyada tanınan, hörmət edilən və seçilən bir ölkə olduğunu qeyd edib:
"Azərbaycan, həmçinin Avropa İttifaqının enerji təhülükəsizliyinə təminat verən dövlətdir. Bu baxımdan hesab edirəm ki, ABŞ qlobal məsələləri həll edərkən, Tramp administrasiyası ABŞ-ni defolt vəziyyətindən çıxarmağa çalışır, yeni tariflər tətbiq edir və bu da dünya üzrə böyük təsir göstərir.
Bütün bunları nəzərə alaraq, biz ABŞ ilə münasibətləri normallaşdırmağa və inkişaf etdirməyə çalışırıq. Azərbaycan prezidenti də qeyd etdiyi kimi ABŞ ilə Cənubi Qafqazda güclü bir tərəfdaş olaraq münasibətlərimizi daha da möhkəmləndirəcəyik. Eyni zamanda qeyd edim ki, bir müddət əvəl Azərbaycanda keçirilən bir tədbirdə ABŞ nümayəndəsi Azərbaycanın bu sahədəki işlərini yüksək qiymətləndirdi".
Müsahibimiz sonda Azərbaycanın Avropa İttifaqının enerji təhlükəsizliyini təmin edən ölkə olaraq, ABŞ ilə çox mühüm tərəfdaş ola biləcəyini vurğulayıb.
Banuçiçək
