“Bild” qəzetinin baş redaktorunun müavini Paul Rontshaymeri bildirib ki, Ukrayna ən pis ssenariyə, xüsusilə də Birləşmiş Ştatların dəstəyinin dayandırılmasına hazırlaşır. "Biz ən pis ssenariyə, yəni ABŞ-nin dəstəyinin dayandırılmasına hazırlaşırıq”, – Ukrayna hökumətindəki mənbə söyləyib.
Eyni zamanda, mənbə ABŞ Prezidenti Donald Trampın sülh planından məyusluğunu ifadə edib. O qeyd edib ki, Amerika lideri Rusiya Prezidenti Vladimir Putinə təzyiq göstərmir və Rusiyaya qarşı sanksiyalar tətbiq etmir.
Ukraynalı diplomat Amerika Prezidenti tərəfindən səsləndirilmiş şərtlərin Kiyev üçün qəbuledilməz olduğunu vurğulayıb.
“Kağız üzərində yazılanlar və danışıqlarda bizə işarə edilənlər qəbuledilməzdir”, – o deyib.
Kiyevin Vaşinqtonun mövqeyindən narazı olması aşağı- yuxarı məlum idi. Çünki nəşrin də qeyd etdiyi kimi, ABŞ Rusiyaya təzyiq göstərmir, Ukraynanı ərazi güzəştinə hazırlayır. Bu, Kiyevin maraqlarına uyğun deyil.
Ən diqqətçəkən məqam Ukraynanın ABŞ- nin dəstəyi dayandırmağa hazır olması ilə bağlıdır. Əgər iddia doğrudursa, deməli, Kiyev Vaşinqtonla razılaşmaq niyyətində deyil. Ona görə də dəstəyin dayandırılmasını real hesab edir. ABŞ bundan əvvəl də Ukraynaya dəstəyi müvəqqəti dayandırmışdı. İndi də eyni şey təkrarlana, daha uzunmüddətli ola bilər. Belə bir vəziyyətdə Ukraynanın Avropadan asılılığı artacaq. Odur ki, Kiyev fərdi şəkildə Avropa dövlətləri ilə və bütövlükdə Avropa İttifaqının (Aİ) özü ilə əlaqələri gücləndirmək istəyə bilər.
Perspektivdə Avropanın Ukraynaya dəstəyi artırması gözləniləndir. Amma bu da birdəfəlik və ideal həll yolu deyil. Çünki bu halda Kiyevin Avropa paytaxtlarından asılılığı artacaq və "onların çaldığı havaya oynayacaq".
Bunları nəzərə alsaq deməliyik ki, perspektivdə Kiyevin Moskva ilə birbaşa danışıqlara cəhd etməsi də real görünür. Çünki nə Avropa, nə də ABŞ Ukraynaya istədiyini verir.
Kənan Novruzov
