“Başımızın üzərində yalnız Azərbaycan bayrağı, Türk dünyasının bayrağıdır. Bizim komandamız Azərbaycan əhalisi, türk xalqlarıdır”
“Hamını, medianı, QHT-ləri, vətəndaş cəmiyyətini bu Hərəkata qoşulmağa çağırırıq. "Qurucular" Hərəkatının məqsədi 5-ci Respublikanın qurulmasıdır. Hakimiyyət 3 yox, 5 qola bölünməlidir. Söz hakimiyyəti də olmalıdır. Müstəqil məhkəmələr qurulmalıdır"
"Siyasi partiyalar haqqında" qanundan sonra fəaliyyətini dayandırmış Azərbaycan Liberal Partiyasının sədri Əvəz Temirxanın da içərisində olduğu bir qrup siyasətçi "Qurucular hərəkatı" yaradıldığını elan ediblər. Qurumun təşəbbüskarı Əvəz Temirxan bildirib ki, hərəkat əhalinin demokratik maarifləndirilməsi, vətəndaşların siyasi proseslərdə ictimai iştirakının artırılması, şəffaf seçkilər keçirilməsinə şərait yaradılması məqsədilə yaradılıb.
Hərəkatın yaradılma qayəsi, missiyası ilə bağlı "Sherg.az"a danışan Əvəz Temirxan bildirib ki, məqsədləri Azərbaycanın Türk dünyasının xoşməramlı liderlərindən birinə çevirməkdir. Siyasətçi vurğulayıb ki, bunun üçün ilk növbədə zəki vətəndaş yetişdirilməlidir:
"Zəki vətəndaşların yaşadığı zəki dövlətin qurulması üçün maarifləndirmə işləri aparacağıq. Birlik, barış, böyümə, inkişaf etmə şüarları ilə çıxış edəcəyik. Təkcə Azərbaycanın deyil, türk birliyinin yox, bütün dünyanın bir araya gəlməsini, vəhdətini təbliğ edəcəyik. Biz unitar, harmonik, sosial, hüquqi dövlət quracağıq. İndiki demokratiya zamanın tələbindən geri qalır. Ona görə də mənim ifadəmlə desək, "beyinokratik" dövlətin qurulması istiqamətində çalışacağıq. Yəni düşünən və düşündürən vətəndaşların olmasını, həmçinin dünyanın sosial ədalət üzərində qurulmasını istəyirik. Öz tarixi köklərimiz - türk ədaləti, ordu-millət, zəki və asan dövlət prinsipləri üzərində dövlətin qurulmasını istəyirik. Dünyaya nümunə olmuş Azərbaycan Xalq Cümhuriyyəti ənənəsini yaşadan bir dövlətin qurulması üçün belə bir Hərəkat yaratmaq fikrinə düşmüşük. "Qurucular hərəkatı" heç kimin adı ilə bağlı deyil. Heç kimi bir başqasının bayrağı altına gətirmirik. Hərəkata rəhbərlik kollektiv olacaq. Başımızın üzərində yalnız Azərbaycan bayrağı, Türk dünyasının bayrağıdır. Bizim komandamız Azərbaycan əhalisi, türk xalqlarıdır. Hamını, medianı, QHT-ləri, vətəndaş cəmiyyətini bu Hərəkata qoşulmağa çağırırıq. "Qurucular" Hərəkatının məqsədi 5-ci Respublikanın qurulmasıdır. Hakimiyyət 3 yox, 5 qola bölünməlidir. Söz hakimiyyəti də olmalıdır. Müstəqil məhkəmələr qurulmalıdır".
Ə.Temirxanın sözlərinə görə, yeni Hərəkatın elan edilməsinin Müstəqillik Gününə təsadüf etməsi təsisçilərin Azərbaycan Xalq Cümhuriyyətinin (1918-1920-ci illər) qurucularının ideyalarına sadiqliyi təcəssüm etdirir:
"Azərbaycan Xalq Cümhuriyyətinin qurucularını rəhmətlə anırıq. Çoxları bilmir ki, Cümhuriyyətin hərbi naziri, Qarabağın general-qubernatoru Xosrov bəy Sultanov mənim nəsil babalarımdandır. Doğma babam Temirxan isə Sultan bəy Sultanovun ən yaxın adamlarından, silahdaşlarından biri olub. Erməni qulduru Andranikə qarşı döyüşüb. Nuru Paşanın rəhbərliyi altında Qafqaz İslam Ordusu tərəfindən Bakının erməni-bolşeviklərdən azad olunmasında Temirxan babamın qardaşı Qasım baba da iştirak edib. Onu da qeyd edim ki, Nuru Paşanın Batumdan qaçırılaraq Laçına, Zəngəzura gətirildiyi deyilir. Uca Tanrı türkü quruculuq üçün yaradıb".
Ə.Temirxanın sözlərinə görə, yaxın günlərdə hərəkat qeydiyyat üçün sənədlərini Ədliyyə Nazirliyinə təqdim edəcək: "Yeni qanuna görə, qeydiyyat üçün müraciət bir ay müddətində edilməlidir. Biz də qanunamüvafiq şəkildə müraciətimizi edəcəyik".
