Lakin bu təhdidlərin bölgədəki şərtləri dəyişdirməyəcəyi də məlumdur
"Xüsusi Təyinatlı Qüvvələrin cənub sərhədlərində təliminin İranın hərbi təlimlərinə cavab olduğu məlumdur". Bu sözləri "Şərq"ə siyasi şərhçi Asif Nərimanlı deyib. Ekspert bildirib ki, burada diqqətçəkən məqam başqadır: "İranın indiyə qədər Azərbaycana qarşı irəli sürdüyü bütün təhdidlərə rəğmən, rəsmi Bakı barışdırıcı mövqe tutur, diplomatik gedişlər edirdi. İndi ilk dəfədir ki, hərbi təhdidə qarşı hərbi müstəvidə cavab verilir. Bunun birdən çox səbəbi var. Birincisi, İranın mövcud rejimi Azərbaycanın bütün xoş niyyətinə rəğmən təhdid ritorikasından əl çəkmir.
Əksinə, barışdırıcı, uzlaşdırıcı mövqeni “geriçəkilmə” kimi qəbul edərək, Bakının üzərinə gəlməyə davam edir. İkincisi, İranın Azərbaycan ərazisinə qarşı mümkün müdaxilə perspektividir. 44 günlük müharibədən sonra İranın təhdidləri artan xətt üzrə inkişaf edir. Lakin bu təhdidlərin bölgədəki şərtləri dəyişdirməyəcəyi də məlumdur.
Bunun fonunda molla rejiminin müdaxilə etməsi senarisi də nəzərə alınmalıdır. İran rəsmiləri və siyasətçilərinin çağırışlarının bu istiqamətdə olması da təsadüfi deyil. Bakı mümkün təhdidlərə və risklərə qarşı hərbi müstəvidə hazırlıq aparır.
Bu həm də o deməkdir ki, Azərbaycan İranın təhdidləri qarşısında öz maraqları və strateji xəttindən geri çəkilməyəcək. Araza “körpü atan”lara qarşı Vətən müharibəsində döyüş sənətini yenidən yazan XTQ-nin kazarmalardan çıxarılması da adekvat “əzələ nümayişi”dir. İran “Yaşma”nı tanımaq istəyirsə, qardaşı Ermənistandan soruşa bilər".
