Azərbaycan 2026-cı ildə İslam Əməkdaşlıq Təşkilatına (İƏT) sədrlik edəcək. Sədrlik 2026-cı ildə Azərbaycanda keçiriləcək İƏT-in 16-cı İslam Sammiti çərçivəsində ötürüləcək. Xatırladaq ki, 2024-cü il mayın 4-də Qambiya Respublikasında İslam Əməkdaşlıq Təşkilatının 15-ci İslam Sammitində 2026-cı ildə İƏT-in 16-cı İslam Sammitinin Azərbaycanda keçirilməsi təsdiqlənib.
Azərbaycan beynəlxalq arenada nüfuzunu getdikcə gücləndirir və mühüm təşkilatların idarəçiliyində daha fəal rol oynayır. Bu baxımdan, ölkəmizin 2026-cı ildə İslam Əməkdaşlıq Təşkilatına (İƏT) sədrlik etməsi əhəmiyyətli hadisədir.
Milli Məclisin deputatı Aydın Hüseynov “Sherg.az”a bildirib ki, ölkəmizdə keçirilən bütün beynəlxalq tədbirlər ən yüksək səviyyədə təşkil olunur:
“Biz bunun üçün çoxlu nümunələr gətirə bilərik. Məsələn, bu yaxınlarda ölkəmizdə baş tutan COP29 konfransı təşkilatçılıq, iştirakçıların sayı və qəbul olunan qərarların növbəti mərhələdə daha ünvanlı olması baxımından ən nümunəvi tədbirlərdən biri idi. Eyni zamanda Azərbaycanın bir çox beynəlxalq təşkilatlarda rəhbərliyi olub. Azərbaycan Qoşulmama Hərəkatına (QH) 4 il sərdlik edib. Qoşulmama Hərəkatı Birləşmiş Millətlər Təşkilatından (BMT) sonra ikinci ən böyük platformadır. Azərbaycan Qoşulmama Hərəkatına rəhbərlik etməklə təşkilatı ən yüksək səviyyədə təmsil etməyi bacardı. Həmçinin Azərbaycan hazırda Asiya Parlament Assambleyasına sədrlik edir. Bir neçə gündən sonra Asiya Parlament Assambleyasının plenar iclası Bakıda baş tutacaq. Bu təşkilata sədrliyi dövründə də Azərbaycan tərəfindən nümunəvi addımlar atıldı. 2026-ci ildə İslam Əməkdaşlıq Təşkilatının (İƏT) sədrliyinin Azərbaycan keçməsi ölkəmizin bu sahədəki təcrübəsindən xəbər verir. Azərbaycan İƏT-ə sədrlik etməklə daha məqsədli fəaliyyət ortaya qoyacaq. Azərbaycan beynəlxalq hüquqa çox hörmətlə yanaşır və bütün dövlətlərin maraqlarının ifadə olunmasını həmişə ön plana çəkir. Burada təbii ki, Azərbaycanın milli maraqları qorunur. Ümumiyyətlə Azərbaycan qarşılıqlı iqtisadi, siyasi, mədəni və digər əlaqələrin formalaşmasına öz töhfəsivi verir. Azərbaycanın İƏT-ə sədrliyi həmin təşkilatının nüfuzunu daha da artıracaq və nəticəsi olan işlər görüləcək”.
