Prezident COP29-un keçirilməsinin təşkili ilə bağlı tapşırıqlar verib.
Hesab edirəm ki, COP29 dünyada ən mötəbər beynəlxalq tədbirlərdən biridir. Ölkələrin təmsilçiliyi nöqteyi-nəzərindən BMT Baş Assambleyasından geri qalmır.
Bu fikri Azərbaycan Prezidenti İlham Əliyev dekabrın 15-də BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasının - COP29-un gələn il ölkəmizdə keçirilməsi ilə əlaqədar keçirilən müşavirədə deyib.
“Ona görə biz dərhal bütün hazırlıq işlərinə start verməliyik. Bizim vaxtımız o qədər də çox deyil, 11 aydan az vaxtımız var. Ona görə mən hesab etdim ki, birinci müşavirəni öz sədrliyimlə keçirim, bütün lazımi tapşırıqları verim. Bu tapşırıqların yerinə yetirilməsi barədə müntəzəm olaraq mənə məlumat veriləcək” – Prezident bildirib.
COP29-un Azərbaycanda keçirilməsinin önəmindən "Sherg.az"a danışan politoloq Aytən Qurbanova bildirib ki, Azərbaycanın gələn il BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasına ev sahibliyi etməsi kifayət qədər önəmli hadisə olaraq dəyərləndirilir:
"Ümumiyyətlə, son illərdə ardıcıl şəkildə beynəlxalq əhəmiyyətli tədbirlərə ev sahibliyi etməsi ölkəmizin qlobal sistemdə dövlətimizin artan nüfuzunun və bizə göstərilən etimadın təzahürüdür. Xüsusilə, ikinci Qarabağ müharibəsindən sonra Bakı və Şuşa şəhərləri həm regional, həm də qlobal tədbirlərə ev sahibliyi etməklə dünyanın ən önəmli siyasi və mədəni paytaxtlardan birinə çevriliblər".
Politoliq belə tədbirlər vasitəsilə iştirakçı dövlətlərin nümayəndələrinə regionda baş verən hadisələr haqqında qərəzsiz və obyektiv məlumat verilməsinin milli maraqlarımızın doğru şəkildə təbliği üçün kifayət qədər önəmli təsirləri özündə ehtiva etdiyini vurğulayıb:
"Ona görə də, düşünürəm ki, əvvəlki tədbirlərə nəzər yetirdikdə COP 29-un ölkəmizdə yüksək səviyyədə keçiriləcəyinə dair heç bir şübhə olmadığı kimi bu tədbirin yeni əməkdaşlıq imkanları üçün mühüm vasitə ola biləcəyi faktı da istisna edilmir".
