Ermənistanda Rusiyapərəst müxalifət ittifaqı 7 iyun 2026-cı il parlament seçkilərinin nəticələrinə etiraz edərək Mərkəzi Seçki Komissiyasına (MSK) müraciət edib. Seçkilərdə Baş nazir Nikol Paşinyanın rəhbərlik etdiyi “Vətəndaş Müqaviləsi” partiyası qalib elan olunmuşdu.
Sherg.az xəbər verir ki, etiraz müraciəti “Güclü Ermənistan” partiyası tərəfindən təqdim edilib. Partiyanın nümayəndəsi Aram Vardevanyan İrəvanda açıqlama verərək seçkilərdə ciddi pozuntuların baş verdiyini iddia edib və nəticələrin ləğvini tələb etdiklərini bildirib.
MSK-nın ilkin nəticələrinə görə, bütün 2 005 seçki məntəqəsindəki səslər sayıldıqdan sonra “Vətəndaş Müqaviləsi” partiyası 49,82 faiz səs toplayaraq birinci olub. Rəsmi nəticələrin 14 iyunda açıqlanması gözlənilir.
Seçkilərdən sonra Paşinyan qələbə bəyanatı verərək partiyasının ölkəni idarə etmək üçün mandat qazandığını bildirib.
11 iyunda MSK iki seçki məntəqəsində səsvermə nəticələrini ləğv edib. Buna səbəb kimi səsvermə prosesi bitdikdən sonra hərbçilərin həmin məntəqələrdə toplanması ilə bağlı məlumatlar göstərilib.
Müxalifət tərəfi bu qərarın bəzi partiyaların səs faizinə təsir etdiyini və parlamentə düşmək üçün tələb olunan 4 faizlik baryerin keçilməməsinə səbəb olduğunu iddia edir.
Paşinyan seçki günü verdiyi açıqlamada Ermənistanın yeni geosiyasi kursuna işarə edərək Qərblə əməkdaşlığın dərinləşdirilməsinin davam edəcəyini bildirib. O qeyd edib ki, Avropa İttifaqı ölkənin demokratik islahatlarında əsas tərəfdaşdır.
Seçkini izləyən beynəlxalq müşahidəçilər prosesin ümumilikdə “yaxşı təşkil olunduğunu”, lakin seçki mühitinin gərgin və bölücü xarakter daşıdığını bildiriblər. Həmçinin Rusiyanın prosesə iqtisadi və siyasi təzyiqlərlə təsir göstərməyə çalışdığına dair iddialar da səsləndirilib.
