“Ağ ölümlə mübarizə” layihəsinin müddəti 3 aydır
Əsas məqsəd tədbirlər və sosial çarx vasitəsilə cəmiyyəti narkomaniya bəlasından xilas etmək yönündə maarifləndirməkdən ibarətdir
Narkotik vasitələrin sui-istifadəsi və qanunsuz dövriyyəsi ilə Beynəlxalq Mübarizə Günü çərçivəsində silsilə tədbirlər təşkil edilir. Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının İşçi Qrupu tərəfindən narkomanlığın zərəri barədə maarifləndirici sosial çarxlar hazırlanıb. Sosial çarxların çəkilişində tanınmış incəsənət xadimləri də iştirak edib. “Narkotik sərhədsiz fəlakətdir”, animasiya formatında olan “İçindəki günəşi qoru, narkotikə yox de” və “802 qaynar xətt” adlı sosial çarxlar Bakı, Sumqayıt və Gəncə şəhərlərinin küçə və prospektlərdəki elektron lövhələrdə nümayiş edilir. Bu barədə Dövlət Komissiyasının mətbuat xidmətinin məlumatında bildirilib. Məlumatda qeyd edilib ki, bu sosial çarxların yayımlanması “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2019-2024-cü illər üçün Dövlət Proqramı”na uyğun olaraq hazırlanıb. Və narkotik vasitələrin qanunsuz dövriyyəsinə və narkomanlığa qarşı mübarizə sahəsində sosial maarifləndirmə işinin daha da genişləndirilməsi məqsədi daşıyır. Videoçarxların uzunmüddətli yayımlanması nəzərdə tutulur. Qeyd edək ki, uzun müddətdir Bakı Metropoliteni stansiyalarının platformalarında, vestibüllərdə narkomaniya əleyhinə sosial plakatlar vurulub. Bu məzmunlu sosial çarxlar metro stansiyalarındakı elektron tablolarda da nümayiş olunur.
Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə yardımı ilə “Narkotizmlə Mübarizə” İctimai Birliyi tərəfindən "Ağ ölüm”lə mübarizə” adlı layihə həyata keçirilir. Layihə çərçivəsində ərsəyə gələcək “Göz yaşı” adlı sosial çarxın geniş təbliği nəzərdə tutulub.
Bu barədə “Sherg.az”a danışan layihə rəhbəri Kənan Qubadzadə maarifləndirici tədbirlərin böyük əhəmiyyət daşıdığını qeyd edərək bildirdi ki, “Ağ ölümlə mübarizə” layihəsinin müddəti 3 aydır və əsas məqsədi tədbirlər və sosial çarx vasitəsilə cəmiyyəti narkomaniya bəlasından xilas etmək yönündə maarifləndirməkdən ibarətdir:
- Bu məqsədə çatmaq üçün Bakı şəhəri, Qəbələ və İsmayıllı rayonlarında narkomaniyaya aludəçiliyin vəziyyəti öyrəniləcək. Layihəyə cəlb olunacaq ekspertlərin köməkliyi ilə gənclərlə bu istiqamətdə fərdi söhbətlər aparılacaq. Sosial platformaların vasitəsilə maarifləndirmə işi geniş auditoriyanı əhatə edəcək. Müxtəlif KİV-lər vasitəsilə maarifləndirmə işi aparılacaq, bu yöndə silsilə yazılar dərc olunacaq. Çəkilən sosial çarxlar disklərə köçürüləcək və Bakı ilə yanaşı regionda da gənclərə pulsuz paylanacaq. Sosial çarxın hər bir tədbirdə təqdimat mərasimi təşkil olunacaq.
