56 yaşlı uelsli aktrisa Ketrin Zeta-Cons 81 yaşlı amerikalı aktyor Maykl Duqlasla 26 illik evliliyinin uzunömürlü olmasının səbəbini açıqlayıb.
Sherg.az xəbər verir ki, Ketrin Zeta-Cons və Maykl Duqlasın münasibətləri təxminən 30 il əvvəl başlayıb. Cütlüyün Dylan və Karys adlı iki övladı var.
2013-cü ildə Maykl Duqlasa boğaz xərçəngi, Ketrin Zeta-Cons isə bipolyar pozuntu diaqnozu qoyulduğu çətin dövrdə cütlük qısa müddətə ayrılıb. Lakin daha sonra yenidən bir araya gəliblər.
Zeta-Cons evliliklərinin sirrinin “çalışmaq” olduğunu deyib. Aktrisa bildirib ki, onların münasibətlərində bir-birindən ayrı keçirdikləri zaman da mühüm rol oynayır.
“Maykl deyir: "Bu işi gör, möhtəşəmdir!" Sonra təyyarəyə minib məni görə bilir”, - deyə aktrisa bildirib.
“The Sunday Times Culture” nəşrinə müsahibəsində Zeta-Cons bildirib ki, həyat yoldaşı ilə daim birlikdə olmaq əvəzinə, hər ikisinin öz işi və şəxsi həyatı ilə məşğul olması münasibətlərini daha sağlam saxlayıb.
“Əgər hər səhər oyanıb ‘Səhər yeməyində nə istəyirsən, əzizim?’ deməli olsaydım, düşünürəm ki, evliliyimiz heç vaxt bu qədər uzun sürməzdi”, - deyə aktrisa qeyd edib.
Təxminən 60 illik karyerasından sonra Maykl Duqlas 2022-ci ildə aktyorluğa fasilə verib və yalnız xüsusi layihə üçün ekranlara qayıdacağını açıqlayıb.
Ketrin Zeta-Cons isə karyerasını davam etdirib. Aktrisa son illərdə populyarlaşan “Wednesday” serialında Mortisiya obrazını canlandıraraq böyük uğur qazanıb. Onun növbəti layihəsi isə keçmiş narkotik kraliçasını canlandıracağı “Kill Jackie” serialıdır.
